Ավան եւ Նոր-Նորք վարչական շրջանների ընդհանուր իրավասության առաջին ատյանի դատարանում շարունակվում է Մանե Թանդիլյանի փոխարեն քվեարկելու մեջ մեղադրվող մանկապարտեզի տնօրեն Կարինե Ստեփանյանի գործի քննությունը:
Դատական նիստի ընթացքում մեղադրողը հայտարարեց՝ պատիժը ծանրացնող հանգամանքները բացակայում են: Անդրադառնալով մեղմացնող հանգամանքներին, նա ասաց, որ Կարինե Ստեփանյանը տվել է խոստովանական ցուցմունքներ, աջակցել քննությանը, դատապարտված չէ: Նա միջնորդեց նշանակել ազատազրկումից մեղմ պատիժ՝ տուգանք 600.000 հազար դրամի չափով:
Կարինե Ստեփանյանի պաշտպանը եւս միջնորդեց ազատազրկումից մեղմ պատիժ նշանակել:
Կարինե Ստեփանյանը հրաժարվեց վերջին խոսքի իրավունքից, պատճառաբանելով, որ իրեն վատ է զգում եւ հավելեց, որ զղջում է կատարվածի համար:
Գործով դատական վճիռը կհրապարակվի մեկ ժամվա ընթացքում:
Ամի ՉԻՉԱԿՅԱՆ
