«ՀԱ» զրուցակիցը ՀՀԿ խորհրդարանական խմբակցության քարտուղար ԳԱԳԻԿ ՄԵԼԻՔՅԱՆՆ է։
-Օրերս շատերի համար անսպասելիորեն պաշտոնանկ արվեց Էներգետիկայի նախարար Երվանդ Զախարյանը, պետեկամուտների կոմիտեն վերստին տարանջատվեց ֆինանսների նախարարությունից։ Ինչո՞վ են պայմանավորված այս փոփոխությունները։
-Կարծում եմ, այդ փոփոխությունները պետք է դիտարկել ճանապարհային քարտեզի շրջանակներում, որ ներկայացրեց նախագահը փետրվարի 12-ի ելույթում։ Դա պետք է ունենար իր շարունակությունը աշխատանքների ավելի արդյունավետ կազմակերպման մակարդակով, առավել եւս, որ նոր սահմանադրությունն ինքնին նպաստում է կառավարման արդյունավետության բարձրացմանը։
Սա ենթադրում է փոփոխություններ ոչ միայն կառավարության կազմում, այլեւ կառուցվածքում։ Հարկային, մաքսային մարմինների տարանջատումը ֆինանսների նախարարությունից լիովին տեղավորվում է այդ տրամաբանության մեջ։ Կարծում եմ, սա ճիշտ մոտեցում է, եւ առաջիկայում մենք կզգանք դրա առավելությունները՝ թե՛ աշխատանքների ավելի արդյունավետ կազմակերպման, թե՛ բյուջեի կատարման առումով։
Կարդացեք նաև
-Կարո՞ղ ենք արձանագրել, որ ՊԵԿ-ի եւ ֆինանսների նախարարության միաձուլումը չդիմացավ ժամանակի փորձությանը։
-Կարող ենք ասել՝ չտվեց այն արդյունքը, որ ակնկալում էինք՝ միացնելով այդ գերատեսչությունները։
-Կարծիք կա, թե դրանով ընդամենը «ազդեցության ոլորտների» վերաբաժանման՝ ֆինանսների նախարար Գագիկ Խաչատրյանի «սուպերնախարարական» լիազորությունները սահմանափակելու խնդիր է լուծվում։
-Դրանք ընդամենը բամբասանքներ են. այդ փոփոխությունները պայմանավորված չեն անձնական ինչ-ինչ նկատառումներով՝ սահմանադրական բարեփոխումներից եւ նախագահի փետրվարի 12-ի ծրագրային ելույթից բխող անհրաժեշտ քայլեր են։ Ընդհանրապես կառավարությունը կենդանի օրգանիզմ է, որը անընդհատ փոփոխությունների կարիք ունի։
Լիլիթ ՊՈՂՈՍՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում