Սերբիայի նախագահ Տոմիսլավ Նիկոլիչի խոսքերով՝ Բելգրադը մեծ հնարավորություններ ունի համագործակցել և´ ՆԱՏՕ-ի և´ ՀԱՊԿ հետ։ Այս մասին տեղեկացնում է Sputnik լրատվական կայքը։
Նախագահ Նիկոլիչը արտահայտվելով Սերբիա-ՀԱՊԿ հնարավոր համագործակցության մասին՝ ասել է. «Ժամանակին ես անձամբ պնդում էի, որ մենք պատվիրակություն ուղարկենք ՀԱՊԿ խորհրդարանական վեհաժողով։ Ռուսները մեզանից նման բան չէին պահանջում, չնայած այդ ժամանակ մեր պատվիրակությունը ներկա էր ՆԱՏՕ-ի խորհրդարանական վեհաժողովի նիստերին»։
Սերբիայի նախագահ Տոմիսլավ Նիկոլիչը խոսել է նաև Սերբիայի՝ ՆԱՏՕ-ին անդամակցելու և դրա հետ կապված ՌԴ հնարավոր արձագանքների մասին. «Ռուսաստանը չի հաշվում, թե քանի տոկոսով ենք կապված Մոսկվայի և քանի տոկոսով ՆԱՏՕ-ի հետ։ Ռուսաստանը գիտի՝ Սերբիայի քաղաքացիները չեն ուզում, որ իրենց երկիրը դառնա ՆԱՏՕ-ի անդամ։ Մենք դա չենք անի»։
Սերբիայի նախագահն ավելացրել է նաև, որ Ռուսաստանին բավարար են նույնիսկ բանավոր երաշխիքներ այն մասին, որ Սերբիան չի ձգտում անդամակցել ՆԱՏՕ-ին։
