«Եթե պարոն Օսկանյանի հիշողությունը չի դավաճանում, պետք է հիշի , որ քաղաքական գործընթացների պատասխանատուն 1999 թվականից նաև ՀՀԿ-ն է: Ռոբերտ Քոչարյանի նախագահության շրջանում կառավարության ղեկավարը երջանկահիշատակ Անդրանիկ Մարգարյանն էր, որը Հանրապետական կուսակցության նախագահն էր։ Եվ եթե Հանրապետականի ուսերին են դնում իրենց կարծիքով ձախողումները, պետք է մի փոքր օբյեկտիվ լինել եւ հիշել, որ եթե 1998-2007 թվականը մենք ունեցել ենք տնտեսական հաջողություններ, այդ հաջողություններն ինչքան իրենցն են իրենք համարում, այնքան էլ Հանրապետական կուսակցությանն են և վարչապետ Անդրանիկ Մարգարյանի կառավարությանը»,- այսօր խորհրդարանում լրագրողների հետ զրույցում ասաց ԱԺ փոխնախագահ Էդուարդ Շարմազանովը` հակադարձելով ԲՀԿ խմբակցության պատգամավոր Վարդան Օսկանյանին։
Հիշեցնենք, այսօր Վարդան Օսկանյանն ասել էր, որ Վարդան Օսկանյանը կարծում է, որ Ռոբերտ Քոչարյանի իշխանությունը բազմաթիվ թերություններ ունեցել է, բայց նաեւ մեծ հաջողություններ է ունեցել` «հատկապես այսօրվա տնտեսական իրավիճակի ու արտաքին քաղաքականության ֆոնին»:
Էդուարդ Շարմազանովի համար նորություն չէ Վարդան Օսկանյանի կարծիքն ու վերաբերմունքը ներկայիս իշխանությանը, բայց նա համարում է, որ արհեստականորեն բաժանում կատարելու կարիք էլ չկա. «ՀՀԿ-ն 1999 թվականից մինչ օրս Հայաստանում ընթացող բոլոր քաղաքական գործընթացների, թե դրականի, թե բացասականի պատասխանատուն է»։
Վարդան Օսկանյանը նաեւ ասել էր, որ այդ ժամանակվա իշխանությունը պատասխանատվություն է կրում 2008 թվականի մարտի մեկին տեղի ունեցած իրադարձությունների համար։ Էդուարդ Շարմազանովը չի վիճում`բոլոր գործընթացների համար, միշտ էլ իշխանությունը պատասխանատու է: «Բայց պատասխանատուն և մեղավորը տարբեր բաներ են»,- ասաց նա`հավելելով, որ կա քննություն եւ ինքը չի ցանկանում իրավական խնդիրների մեջ մտնել:
Կարդացեք նաև
Նելլի ԳՐԻԳՈՐՅԱՆ
