Այսօր ԱԺ պետաիրավական հարցերի հանձնաժողովը Ընտրական օրենսգրքի թեմայով խորհրդարանական լսումներ էր կազմակերպել:
«Պառլամենտական սերունդ» ՀԿ նախագահ Մեխակ Մխիթարյանը կառավարության աշխատակազմի ղեկավար-նախարար Դավիթ Հարությունյանին հարցրեց՝ ընտրակաշառքը, որպես չարիք, կարո՞ղ եք վերացնել, դա է մեր ընտրությունների անքակտելի մասը, վստահության ամենամեծ խոչընդոտն է: Ինչպիսի՞ կարգավորումներ են նախատեսված այդ առումով Ընտրական օրենսգրքում, կամ գոնե Քրեական օրենսգրքում:
Դավիթ Հարությունյանը պատասխանեց. «Այն, որ ընտրակաշառքը քրեական հանցագործություն է, դրա մասին խոսք չկա, եւ այսօր էլ ՔրՕրում դա առկա է: Պատժի խստացումը լավագույն միջոցը չէ քրեական հանցագործությունները կանխելու համար: Ինչով է ընտրակաշառքը տարբերվում սովորական կաշառքից. Սովորական կաշառքի պարագայում հանցագործություն կատարողն այն անձն է, ով պահանջում է կաշառք, իսկ ընտրակաշառքի պարագայում հակառակն է: Ընտրակաշառք ստացողը եթե հայտարարի այդ մասին, նա կարող էր ենթարկվել քրեական պատասխանատվության, սակայն այդ հարցը լուծված է»:
Կարդացեք նաև
ՀԺԱՄ կուսակցությունը ներկայացնող Տիգրան Գալստյանն էլ հարցրեց, «Օրենսգրքի 84-րդ հոդվածի համաձայն, կուսակցությունները, դաշինքի համապետական ընտրական ցուցակի առաջին մասում ընդգրկում են ոչ պակաս 80, ոչ ավելի, քան 300 թեկնածու: Տարածքային ընտրական ցուցակներում կուսակցությունը պետք է ունենա նվազագույնը 65 թեկնածու, ինչը փոքր կուսակցությունների համար արհեստական խոչընդոտ է, արգելք է հանդիսանում: Օրինակ, ՀԺԱՄ-ը եթե ներկայացված չի Շիրակի մարզում, մեր մուտքը արգելվում է, տաբու է դրվում մեր առաջ»:
Դավիթ Հարությունյանը պատասխանեց. «Դուք հավակնում եք հավաքել ձայների 5 տոկոսը, այսինքն, 70 հազար ձայն ձեր օգտին ենթադրում եք ստանալ, բայց դուք կարծում եք, որ չեք կարող ունենալ 80 հոգի կամ ամեն մարզում 5-ական հոգի: Ներեցեք, բայց ԱԺ-ն լուրջ եւ մեծ կուսակցությունների տեղ է: Կան երկրներ, որտեղ ցուցակներով են մասնակցում կուսակցությունները, ընդգրկելով մարդկանց, որոնց մասին ոչ ոք չի լսել, բացի այդ կուսակցության անդամներից: Սա ոչ թե ժողովրդավարական գործընթաց է, այլ հակաժողովրդավարական: Ընտրողին դնում է շփոթության մեջ: Այնպես որ, կարծում եմ, ԱԺ-ն առնվազն այն կուսակցությունների տեղն է, որոնք կարող են ունենալ 80 կուսակցության անդամ եւ ամեն մարզում առնվազն 5 անդամ»:
Նա հորդորեց փոքր կուսակցություններին, որ նախ այդ հարցը լուծեն, ամեն մարզում գոնե 5 հոգի ունենան, նոր հավակնեն գալ ԱԺ:
Հռիփսիմե ՋԵԲԵՋՅԱՆ
