Ինչպես ավելի վաղ հայտնել էինք, «Զու Ֆաունա Արտ» ընկերության տնօրեն Արթուր Խաչատրյանն այսօր «Անալիտիկ» ակումբում լրագրողներին ասաց, որ Տանզանիայում ձերբակալված Արտյոմ եւ Էդուարդ Վարդանյաններն առնչություն չունեն կենդանիների ապօրինի արտահանման հետ:
Խաչատրյանը մեկնաբանեց նաեւ Ինտերպոլի կողմից հետախուզման մեջ լինելու հանգամանքը: Ըստ Ինտերպոլի` նա անօրինական ճանապարհով «Բոնոբո» տեսակի կապիկներ է ներմուծել Հայաստան:
«Չգիտեմ ում դուր չի գալիս այս բիզնեսը: Շատերը կասեն` վայ, ինչ վատ տղա է, կենդանիների է գնում եւ վաճառում… Ասում են, որ ես Կոնգոյում «վատ բան» եմ արել, բայց ես Կոնգոյում անգամ չեմ էլ եղել եւ չէի կարող ոչ մի «վատ բան» անել: Իմ դեմ ոչ մի փաստ դեռեւս չկա. արդեն մի տարի է` սպասում եմ, որ Կոնգոյից քննիչ գա ու ասի, թե ես ինչ անօրինական բան եմ արել»,- ասաց Խաչատրյանը:
Նա նշեց, որ իրավունք ունի ձեռք բերել, փոխանակել եւ վաճառել Տանզանիայից բերված կենդանիներին. «Գործում եմ օրինական փաստաթղթերով` ՀՀ եւ միջազգային օրենսդրությանը համապատասխան»:
Կարդացեք նաև
Մինչ օրս Հայաստան տեղափոխված կենդանիների քանակն Արթուր Խաչատրյանը դժվարացավ ասել, բայց հայտնեց, որ շուտով մասնավոր կենդանաբանական այգի է հիմնելու, որը, իր բնորոշմամբ, բացառիկ է: «Ոչ մեկ չի արգելում մասնավոր` գեղեցիկ գազանանոց ունենալ, որտեղ ընտանիքը կարող է հանգստանալ: Երբեմն կարդում ես, որ երեխաները չպետք է փղերի եւ ընձուղտների տեսնեն, «տաբու» է դրված… Հիմար բաներ են գրում, թե դա «կոնտրաբանդա» է: Գոնե հասկանան` տեսնեն, ուսումնասիրեն, նոր գրեն»,-հավելեց նա` այլ մանրամասներ չհրապարակելով:
Լուիզա ՍՈՒՔԻԱՍՅԱՆ
