«Առանց Թուրքիայի գիտության՝ Ադրբեջանը չէր սկսի ապրիլյան արկածախնդրությունը»,- իր այս ենթադրությունով «Անդրադարձ» մամուլի ակումբում լրագրողների հետ կիսվեց ԳԱԱ Հայոց ցեղասպանության թանգարան-ինստիտուտի տնօրեն, պատմական գիտությունների դոկտոր Հայկ Դեմոյանը:
Նա նշեց, որ առաջին թնդանոթի միսը, որը կոտորվեց, ադրբեջանական բանակի հարձակողական ուժը թուրքական արտադրության էր: Այսինքն՝ անցել էին ռազմական պատրաստվածություն թուրքական ուսումնարաններում: Հայկ Դեմոյանն ասաց, որ այս հակամարտության տաք փուլում եւս Թուրքիան հանդես եկավ Ադրբեջանի կողմից որպես հակամարտության հրահրող, թեժացնող կողմ, այլ ոչ թե դրա հանգուցալուծման կողմ:
«Հստակ երեւաց, որ կա մեկ պետություն, որը այս պարագայում բացարձակ եւ լիարժեք կերպով պաշտպանում է հակամարտության կողմերից մեկին»,- ասաց Հայկ Դեմոյանը:
Հայկ Դեմոյանի կարծիքով՝ապրիլյան դեպքերից հետո բացարձակապես նոր իրավիճակ է ստեղծվել. «Ես չեմ հավատում միջնորդների արդյունավետությանը, ես չեմ հավատում որեւէ սկզբունքների: Որովհետեւ իմ անհավատ լինելու համար առիթ հանդիսացավ այդ նույն ապրիլյան արկածախնդրությունը: Ես պատրանք չունեմ, որ Ադրբեջանի ղեկավարությունը, որ այսօր ամեն կերպ պետք է փորձի բացատրել, թե ինչու չստացվեց, նորից կփորձի մեզ հետ բանակցություններ վարել, ես հակառակ կողմից եմ սկսում տրամաբանել:
Կարդացեք նաև
Իսկ մեր ձեռքում այժմ կա հաղթաթուղթ, որը տվել է մեր զինվորը, մենք պետք է խոսենք ուժի դիրքերից, ոչ թե փոխզիջումների: Փոխզիջումները այլեւս հայ հանրությունը չի հասկանա, որքանով էլ մենք փորձենք մեկնաբանել, միջազգային լսարանը մեզ չի հասկանա:
Ստեղծվել է լրիվ այլ իրավիճակ. Ադրբեջանի շուրջ շատ վատ տեղեկատվական, քարոզչական միջավայր է ստեղծվել, Ադրբեջանի ներսում էլ կա լուրջ խնդիր, մենք պետք է օգտվենք դրանից եւ զարգացնենք դրան, այլ ոչ թե պասիվ դիտորդի դերում լինենք»:
Ամի ՉԻՉԱԿՅԱՆ
