ԱՄԷ-ում մեկնարկած 18-րդ Դուբայ օփեն շախմատի միջազգային մրցաշարում, որին մասնակցում են աշխարհի տարբեր երկրներից 195 շախմատիստներ, Հայաստանը ներկայացնող գրոսմայստեր Վլադիմիր Հակոբյանը կայացած երեք տուրից հետո հարյուր տոկոսանոց արդյունքով գլխավորում է մրցաշարային աղյուսակը: Նրանից կես միավոր՝ 2,5, պակաս վաստակել են գրոսմայստերներ, Հայաստանի ազգային հավաքականի անդամներ Գաբրիել Սարգսյանն ու Հայաստանի գործող չեմպիոն Զավեն Անդրիասյանը: Նրանք ընթանում են, համապատասխանաբար, 11-րդ եւ 29-րդ հորիզոնականներում: Մեր մյուս երկու մասնակիցները՝ Հովհաննես Հակոբյանն ու Լիլիթ Գալոյանը անհաջող են մեկնարկել եւ տեղ են զբաղեցնում մրցաշարային աղյուսակի ստորին հորիզոնականներում:
Աբու-Դաբիում շարունակվում է շախմատի ուսանողների աշխարհի առաջնությունը: Խաղացվել է յոթ տուր ու գնալով պայքարը առաջատարների համար դժվարանում է:
Տղամարդկանց առաջնությունում Հովհաննես Գաբուզյանը 6,0 միավորով առաջին տեղը բաժանում է ռուսաստանցի Վլադիմիր Ֆեդոսեեւի հետ: Տիգրան Ս. Պետրոսյանը եւ գրոսմայստեր Սամվել Տեր-Սահակյանը 5,0-ական միավորով լավագույն տասնյակում են եւ, համապատասխանաբար, ընթանում են 4-րդ եւ 6-րդ տեղերում:
Կանանց մրցապայքարի մեր միակ մասնակիցը՝ Հայաստանի 2016 թվականի չեմպիոն Մարիա Գեւորգյանը, որ հինգերորդ տուրից հետո գլխավորում էր մրցաշարային աղյուսակը, երկու անգամ «սայթաքեց»: Նա իր անվան դիմաց գրանցել է 4,5 միավոր եւ նահանջել յոթերորդ հորիզոնական:
Կարդացեք նաև
ԱՇՈՏ ՀԱԿՈԲՅԱՆ
«Առավոտ» օրաթերթ
15.04.2016
