«Լրագրողներ առանց սահմանների» կազմակերպությունը հրապարակել է 2016 թվականի մամուլի ազատության համաշխարհային աղյուսակը: Այդ աղյուսակում Հայաստանը առաջընթաց է գրանցել, նա զբաղեցնում է 74-րդ տեղը, երբ 2015 թվականի տվյալներով 78-րդ տեղում էր:
Կազմակերպությունը նշում է, որ Հայաստանում տպագիր լրատվամիջոցները բազմազան են եւ բեւեռացված, հետաքննական լրագրությունը բարգավաճում է համացանցում, սակայն բազմակարծությունը հեռարձակվող լրատվամիջոցներում հետ է մնում:
Կազմակերպությունը նաեւ մտահոգիչ է համարում, որ Հայաստանում լրագրողների նկատմամբ ոստիկանության բռնությունը շարունակում է անպատիժ մնալ:
Ըստ «Լրագրողներ առանց սահմանների» կազմակերպության, ամենաազատ մամուլն ունեն Ֆինլանդիան, Նիդերլանդները, Նորվեգիան, իսկ վատ արդյունքներ են գրանցել Թուրքմենստանը, Հյուսիսային Կորեան եւ Էրիթրեան:
Կարդացեք նաև
Մեր հարեւաններ Վրաստանը եւ Իրանը եւս առաջընթաց են գրանցել՝ համապատասխանաբար զբաղեցնելով 65-րդ եւ 169-րդ տեղերը: Իսկ Թուրքիան եւ Ադրբեջանը հետընթաց են գրանցել՝ համապատասխանաբար զբաղեցնելով 151-րդ եւ 163-րդ տեղերը:
Ամի ՉԻՉԱԿՅԱՆ
