civilnet.am. Ազգային ժողովի չորս պատգամավորներ` Վարդան Օսկանյանը, Էլինար Վարդանյանը, Ստեփան Մարգարյանը և Վահե Հովհաննիսյանը, հանդես են եկել հայտարարությամբ, որում վերահաստատում են նոր Ընտրական օրենսգիրքը բարեփոխելու իրենց մոտեցումները` նշելով, որ այն պետք է ընդունվի կոնսենսուսով:
«Ընտրական նոր օրենսգրքի քննարկման «4+4+4» ձևաչափի հաստատումից անմիջապես հետո մենք հրապարակավ աջակցեցինք իշխանական կոալիցիայի մաս չկազմող ԱԺ խմբակցությունների և հասարակական կազմակերպությունների համատեղ ներկայացրած հինգ պահանջներին։ Մենք հույս ունեինք, որ բանակցությունների արդյունքում կհաջողվեր հասնել կոնսենսուսի, ինչը հատկապես այսօրվա իրողությունների պարագայում խիստ կարևոր է։
Ցավով պետք է արձանագրել, որ կողմերի հրապարակային հայտարարություններից պարզ է դառնում, որ չի կայացրել համաձայնություն առանցքային որևէ հարցի վերաբերյալ։ Չեն գտնվել փոխադարձաբար ընդունելի լուծումներ։
Այս պայմաններում մենք անթույլատրելի ենք համարում իշխանությունների կողմից անզիջում վարքագիծը և հինգ պահանջներին ընդառաջ չգնալու գործելաոճը։ Դա չի բխում մեր պետության և հասարակության շահերից։
Կարդացեք նաև
Մենք վերահաստատում ենք մեր մոտեցումները Ընտրական նոր օրենսգիրքը բարեփոխելու ուղղությամբ և պնդում ենք, որ այն պետք է ընդունվի կոնսենսուսով։ Եվ պետք է շարունակել քննարկումները այդ ուղղությամբ»,- ասված է չորս պատգամավորների հայտարարության մեջ։
***
Ընտրական օրենսգրքի նախագիծը կառավարությունը հաստատեց մարտի 3-ի նիստին և ուղարկեց խորհրդարանի հաստատմանը: Ըստ ժամանակացույցի՝ մինչև հունիս նոր Ընտրական օրենսգիրքը պետք է ընդունված լինի, որով և կանցկացվեն 2017թ. խորհրդարանական ընտրությունները:
Ընտրական օրենսգրքի նախագծի շուրջ 4+4+4 ձևաչափով բանակցությունները Ազգային ժողովում մեկնարկել էին մարտի 30-ին: ԱԺ ՀԱԿ խմբակցության ղեկավար Լևոն Զուրաբյանի առաջարկած այս ձևաչափը նախատեսում էր Ընտրական օրենսգրքի նախագծի շուրջ բանակցություններ` իշխանական և ընդդիմադիր խմբակցությունների, նաև հասարակական կազմակերպությունների չորսական ներկայացուցիչների մասնակցությամբ:
4+4+4 պայմանական ձևաչափով քննարկումներին մասնակցած հասարակական կազմակերպությունների ներկայացուցիչները ապրիլի 20-ին հանրային հաշվետվություն են ներկայացրել, որում նշում են, որ չնայած ներդրված ջանքերին՝ ակնկալվող կոնսենսուսը չկայացավ, և «քննարկումները ՀՀ պետական մարմինների ներկայացուցիչների անզիջում դիրքորոշման պատճառով որևէ էական արդյունք չտվեցին, որը կարելի լիներ գնահատել որպես Հայաստանի ընտրական համակարգի բարեփոխման նախադրյալ»:
