«Հայ ժողովրդի ուժն իր դժվարություններին հումորով մոտենալու մեջ է։ Նույնիսկ 1988-ի Սպիտակի երկրաշարժից հետո՝ արդեն հաջորդ օրը, մարդիկ անեկդոտներ էին հորինում»,- ասում է գրող, լրագրող, դերասան Ռուբեն Փաշինյանը:
Մութ ու ցուրտ տարիներ, երկար ու ձիգ հերթեր, ավտոբուսների դռներից կախված մարդիկ, կտրոնով հաց, էլեկտրաէներգիայի, գազի և ջրի անջատումներ, սով… Շրջափակումը փորձություն էր, որն 90-ականների սկզբին բաժին ընկավ հայ ժողովրդին:
Այդ տարիների դժվարությունների մասին հիշողություններն ամփոփվել են «Բլոկադա.am» ժողովածուում, որի շնորհանդեսը տեղի կունենա ապրիլի 30-ին Երևանի պետական կամերային թատրոնում:
Գաղափարի հեղինակը ռուս գրող Եվգենի Պոպովն է։
Կարդացեք նաև
«Մի քանի տարի առաջ՝ ռուսերեն ստեղծագործող երիտասարդ արձակագիրների փառատոնի շրջանակներում, հայ հեղինակները ներկայացան 90-ականների շրջափակման մասին պատմվածքներով,- պատմում է Ռ. Փաշինյանը.- ամեն անգամ, երբ Եվգենի Պոպովը լսում էր «շրջափակում» բառը, զարմանում էր, չէր հասկանում՝ ինչի մասին է խոսքը։ Կարծում էր՝ խոսքը Լենինգրադի շրջափակման մասին է: Այդ ժամանակ էր, որ ես ու իմ գործընկերները պատմեցինք նրան, թե ինչ շրջափակման մասին է խոսքը: Դրանից հետո էլ ծնվեց «Բլոկադա.am»-ն ստեղծելու գաղափարը»,- պատմում է ժողովածուի կազմող Ռուբեն Փաշինյանը։
«Բլոկադա.am»-ն անդրադառնում է 1990-ականներն ապրածների պատմություններին ու հիշողություններին:
Նախաձեռնության հեղինակներն, այսպիսով` փորձում են աշխարհին ու միջազգային հանրությանը ցույց տալ, թե ով է հայը, ինչ դժվար ճանապարհ է անցել, և որ նրա համար սարսափելի չէ անգամ պատերազմը:
Սիրանուշ ՀԱՅՐԱՊԵՏՅԱՆ
