Որքան էլ հասարակության կողմից շահարկվի, թե ռուսաստանաբնակ հայությունը պասիվ է այս օրերին Արցախում տեղի ունեցող գործընթացներին, փաստերը հակառակն են ապացուցում։ Պարզապես ամենք այլը չի հրապարակվում, ինչի արդյունքում էլ նման տպավորություն է ստեղծվում:
Ապրիլյան քառօրյա պատերազմի մասին լուրը ստանալով` Ստավրոպոլի երկրամասի Ստավրոպոլ քաղաքի բազմաթիվ հայեր դրամահավաք կազմակերպեցին, որի արդյունքում 118 մարդ ներգրավվեց ու հավաքվեց 336.500 ռուբլի: Համընդհանուր համաձայնությամբ Ստավրոպոլից անձամբ մեկնեցին Արցախ` իրենց իսկ ձեռքով հանձնելու առաջին անհրաժեշտության իրեր, սնունդ, ինչպես նաեւ դրամական օգնություն ցուցաբերվեց պատերազմի ընթացքում տուժած սահմանամերձ բնակավայրերի բնակիչներին:
Փաստենք ավելին, որ Ստավրոպոլի հայերը արցախահայությանը օժանդակում եւ օգնություն են ցուցաբերում, քանի որ յուրաքանչյուրի մեջ անմար է հայի, արցախցու գենը: Պարզապես, թե Արցախի եւ թե Հայաստանի իշխանությունների նկատմամբ անվստահությունն այնքան մեծ է, որ այդ ամենը կազմակերպվում եւ իրականացվում է մարդկանց, այլ ոչ թե իշխանությունների, կառավարությունների եւ համայնքների միջոցով: Եվ ստավրոպոլահայերի համար կարեւորը PR-ն ու կառավարության գնահատանքը չէ, այլ՝ սահմանից ստացված շնորհակալական նամակները:
ԱՆԱՀԻՏ ՔՈՉԱՐՅԱՆ
Ստավրոպոլ
Կարդացեք նաև
«Առավոտ» օրաթերթ
10.05.2016
