«Պարզվեց, որ մենք ապրում ենք կեղծ իրականության մեջ»,- մայիսի 12-ին «Հայացք» մամուլի ակումբում լրագրողների հետ հանդիպման ընթացքում ասաց Շուշիի առանձնակի գումարտակի ազատամարտիկների միավորում հասարակական կազմակերպության վարչության անդամ Քերոբ Ղազարյանը:
Նա նշեց, որ Հայաստանի իշխանությունները անընդհատ պնդում էին, որ մենք լավ ենք ապրում, տնտեսական աճ ենք արձանագրում, որ արտագաղթը բնական երեւույթ է, ունենք տարածաշրջանի ամենամարտունակ բանակը, մեր սահմանները ապահով են եւ մենք առաջ ենք գնում: Սակայն, ըստ նրա, իրականում Հայաստանը թաղված է կաշառակերության, կոռուպցիայի, ամենաթողության մեջ. «Եվ հանկարծ եկավ ապրիլը: Մեր իշխանությունների որդեգրած քաղաքականությունը, այսպես ասած «ոչ պատերազմ, ոչ խաղաղություն»-ը պայթեց պատերազմով: Եվ այդ պատերազմը բախեց բոլորի դռները՝ Ղարաբաղից մինչեւ Գյումրի, Տավուշ՝ Հայաստանի բոլոր մարզերը, հարյուրավոր սեւ թղթեր ստացանք: Այն դեպքում, երբ երկու տարուց ավելի է լարվածությունը աճում էր թե՛ Ղարաբաղի սահմաններում, թե՛ Հայաստանի սահմաններում»:
Քերոբ Ղազարյանը համարում է, որ պատերազմը բոլորի համար անակնկալ եղավ, որովհետեւ դրան պատրաստ չէինք: Նա համարում է, որ մինչեւ առաջնագիծ գնալը կամավորները պարտավոր են անցնել համապատասխան վարժանքների շրջան, վերհիշել իրենց ծառայությունը, ծանոթանալ նոր զինատեսակներին, մարտավարությանը եւ դրանից հետո միայն մեկնել ռազմաճակատ:
Կարդացեք նաև
Քերոբ Ղազարյանը հայտնեց, որ իրենց հայտարարությունից հետո մի քանի հարյուր մարդիկ ցուցակագրվել են աշխարհի տարբեր հատվածներից՝ Լեռնային Ղարաբաղից, Ռուսաստանից, Եվրոպայից, Վրաստանից, Միացյալ Նահանգներից, Բեյրութից եւ Թուրքիայից, Հայաստանից: Ցուցակագրված կամավորների 15 տոկոսը կազմում են կանայք, մինչեւ 30 տարեկան կամավորները՝ 20 տոկոս, 31-50 տարեկանները՝ 50 տոկոս եւ 50-ից բարձր՝ 30 տոկոս. «Մեր ծրագրերի մեջ մտնում է դիմել Հայաստանի Հանրապետության պաշտպանության նախարարությանը, որպեսզի այս մարդկանց հետ անցկացնեն զորավարժանքներ, կազմվեն ստորաբաժանումներ, նշանակվեն հրամանատարներ: Միայն այդ ամենը անցկացնելուց հետո պաշտպանության նախարարության տրամադրության տակ մեկնել համապատասխան վայր՝ իրենց ծառայությունը անցկացնելու համար»:
Մամուլի ակումբում ներկա էին Ռուսաստանի Դաշնությունից եկած 2 կամավորներ՝ Հովհաննես Հարությունյանը եւ Թաթուլ Թամրազյանը: Վերջինս նշեց, որ իր կյանքի 20 տարիները ապրել է Սիբիրում, նա վստահություն հայտնեց, որ դեռ շատերը կգան Հայաստան. «Դժվար ժամանակներ են, մարդիկ են պետք, ինչպես ես: Նրանք պետք է այստեղ գան, որովհետեւ դրա կարիքը կա: Պետք է գան ոչ թե 10-20 հոգի, այլ հազարավոր մարդիկ»:
Իսկ Հովհաննես Հարությունյանը հավելեց. «Բոլորը միաձայն ասում են՝ եթե սկսվի կգանք, արդեն վաղուց է սկսվել»:
Ամի ՉԻՉԱԿՅԱՆ
