2016թ. մայիսի 29-ին Ստամբուլում մեծ շուքով նշվել է 1453թ. Օսմանյան սուլթան Մեհմեդ Երկրորդ Ֆաթիհի Կողմից Բյուզանդիայի մայրաքաղաք Կոստանդնուպոլսի նվաճման 563-ամյակը։ Այս մասին տեղեկանում ենք Թուրքիայի նախագահական նստավայրի պաշտոնական կայքից։
Տոնական միջոցառումներին մասնակցել են Թուրքիայի նախագահ Ռեջեփ Թայիփ Էրդողանը, վարչապետ Բինալի Յըլդըրըմը, բարձրաստիճան մի շարք պաշտոնյաներ։ Կոստանդնուպոլսի նվաճման 563-ամյակի կապակցությամբ ելույթ է ունեցել նախագահ Էրդողանը։ Անդրադառնալով Ստամբուլի նվաճմանն ու ներկայիս գործընթացներին՝ Էրդողանն ասել է. «Անջատողական ահաբեկիչներին մեր դեմ որպես նիզակ օգտագործողների, մեզ վրա հարձակվողների նպատակը ո´չ մեր քուրդ եղբայրներն են, ո´չ էլ այս տարածաշրջանն է, նրանց նպատակը Կոստանդնուպոլսի նվաճման վրեժը լուծելն է»։
Կարդացեք նաև
Անդրադառնալով թուրք-քրդական բախումներին՝ Էրդողանն ասել է. «Այս երկրում քրդական խնդիր գոյություն չունի, այս երկրում ահաբեկչության խնդիր կա»։
Էրդողանը խոսել է նաև Սիրիական ճգնաժամի, Իրանի Իսլամական Հանրապետության և Ռուսաստանի Դաշնության մասին. «Ռուսաստանն ու Իրանն ի՞նչ գործ ունեն Սիրիայի հետ։ Որոշ ուժեր ցանկանում են բաժանել Թուրքիային Մերձավոր արևելքից և Հյուսիսային Աֆրիկայից»։
