«Պաշտոնապես ճանաչելով և դատապարտելով Հայոց ցեղասպանությունն ու հիշատակի տուրք մատուցելով 1 500000 անմեղ զոհերի հիշատակի առջև, Գերմանիան ևս մերժեց թուրքական ժխտողականությունն ու քաղաքական շանտաժի դրսևորումները»,- Aravot.am-ի հետ զրույցում ասաց ԱԺ արտաքին հարաբերությունների հանձնաժողովի նախագահ Արտակ Զաքարյանն` անդրադառնալով Գերմանիայի խորհրդարանի կողմից Հայոց ցեղասպանությունը ճանաչող բանաձեւի ընդունմանը:
Հարցին` ինչո՞ւ Գերմանիան հիմա գնաց այդ քայլին, երբ Գերմանիա-Թուրքիա հարաբերություններում կնճիռներ կան. արդյոք հայկական հարցն իբրեւ մահակ է օգտագործվում, մեր զրուցակիցն ասաց. «Թուրքիան, բացի իրենից ու իր անցյալից, որևէ միջազգային գործընկերոջից նեղանալու բարոյական ու քաղաքական հիմքեր չունի: Գերմանիան և երկու տասնյակից ավելի պետություններ ցույց տվեցին, որ բացի քաղաքական շահերից, աշխարհում կան նաև անանցանելի ու անբեկանելի արժեքներ»:
«Ես կարծում եմ, որ քաղաքական շահերը կամ հակասությունները դրանից չեն փոխվելու: Երկու տասնյակից ավելի պետություններ են ճանաչել Հայոց Ցեղասպանությունը, բայց դրանով չի փոխվել այդ պետությունների հետ Թուրքայի համագործակցությունն ու քաղաքական անընդհատ շահերը: Ուղակի պետք է ի նկատի ունենալ, որ թուրքական շանտաժը այդքան էլ սարսափելի չէ, որքանով որ այն ներկայացնում են թուրք քաղաքական գործիչները: Հայոց Ցեղասպանության միջազգային ճանաչմամբ աշխարհը պետք է օգնի թուրքիային դուրս գալ կեղծիքի ու ժխտողականության ճահիճից»,- եզրափակեց մեր զրուցակիցը:
Նելլի ԳՐԻԳՈՐՅԱՆ
