«Տարոն Չախոյանն այս անգամ խոսում էր շատ կոռեկտ, շատ նորմալ խոսույթով։ Ուզում եմ հասկանալ՝ ի՞նչն էր նրանց զայրույթի պատճառը։ Որովհետև նրանց ելույթները մեզ ոչ հաճելի են, ոչ էլ դուր են գալիս, դրանց հետ համաձայն չենք, բայց երբեք տեղից նման արձագանքներ չենք տալիս»,- այսօր ԱԺ-ում լրագրողների հետ զրույցում իր զարմանքն էր հայտնում ՔՊ խմբակցության ղեկավար Արուսյակ Մանավազյանը՝ անդրադառնալով խորհրդարանում տեղի ունեցած աղմկահարույց ծեծկռտուքին։
«Անզուսպն իրենք են։ ԱԺ ամբիոնն այն վայրն է, որտեղ մենք խոսում ենք, և այնտեղ որևէ մեկն անձեռնմխելի չէ։ Որևէ մեկն իրավունք չունի տեղից հարձակվելու ամբիոնի վրա կամ փորձելու հարվածել։ Անթույլատրելի է, չի կարելի։ Իրենց պատգամավորները, երբ ելույթ են ունենում, մենք չենք արձագանքում։ Մենք զուսպ ենք, կարողանում ենք մեզ տիրապետել»։
ԱԺ նախագահի պահվածքն էլ Մանավազյանը միանգամայն բնականոն է գնահատում։
Կարդացեք նաև
«Նա կոչ արեց նստել և շարունակել նիստը։ Երբ տեսավ, որ նիստը չի շարունակվում, անջատեց ուղիղ հեռարձակումը և հրավիրեց անվտանգության աշխատակիցներին։ Եթե որևէ դեպքի հետ կապված կրքերը չեն հանդարտվում, հարցեր ունեն, թող պարզեն, ավարտեն։ Նորմալ է, հասուն պատգամավորներ են, իրար քաշքշում են. ի՞նչ կա այդտեղ աննորմալ»,- նշեց Մանավազյանը։
Արփինե ՍԻՄՈՆՅԱՆ
