Թուրքիայի վարչապետ, այդ երկրի իշխող «Արդարություն և զարգացում» կուսակցության նախագահ Բինալի Յըլդըրըմը հանդիպել է իր կուսակցության պատգամավորների հետ, եւ խոսել է Թուրքիայի ահաբեկչությանը և քրդերին առնչվող մի շարք թեմաների վերաբերյալ։ Այս մասին տեղեկացնում է թուրքական «Միլիյեթը»։
Վարչապետ Յըլդըրըմն ասել է, որ այս օրերին իրենք առաջարկներ են ստանում ահաբեկչական խմբավորումներից, որոնք պատրաստակամություն են հայտնում վայր դնել զենքերը և նստել բանակցությունների սեղանի շուրջ։ Յըլդըրըմն անմիջապես էլ պատասխանել է այդ առաջարկին. «Մենք խոսելու ոչինչ չունենք»։
Յըլդըրըմը նշել է, որ այդպիսի առաջարկ իրենք ստացել են «Քրդական աշխատավորական» կուսակցությունից (կուսակցությունը Թուրքիայում համարվում է ահաբեկչական խմբավորում,-խմբ.) կամ դրա շառավիղներից։ Թուրքիայի վարչապետի խոսքերով՝ իրենք շարունակելու են ահաբեկչության դեմ պայքարն այնքան, մինչև կապահովվի երկրի ցանկացած մասում բնակվող քաղաքացու անվտանգությունը։
