Լեհաստանի պաշտպանության նախարար Անտոնի Մաչերեվիչը խոսել է Ռուսաստանի Դաշնության և Եվրոպայի միջև հարաբերությունների, ինչպես նաև համաշխարհային քաղաքականության վրա Ռուսաստանի ազդեցության մասին, տեղեկացնում է ռուսական «ՌԻԱ» լրատվական գործակալությունը։
Նախարարի կարծիքով՝ Ռուսաստանը լուրջ սպառնալիք է աշխարհի համար. «Ռուս ժողովրդի հանդեպ ամբողջ հարգանքով հանդերձ՝ Ռուսաստանն ամենամեծ սպառնալիքն է աշխարհի անվտանգության համար»։
Տեղեկացնենք, որ Լեհաստանի պաշտպանական գերատեսչության ղեկավար Մաչերեվիչը հայտնի է նմանատիպ հայտարարություններով։ 2016թ. հունիսի սկզբին նախարարը հայտարարել էր, որ ՆԱՏՕ-ի ընդամենը մեկ գումարտակ կարող է զսպել Ռուսաստանի Դաշնությանը։
Հիշեցնենք, որ Ուկրաինայի հարցով Ռուսաստանի հետ առաջացած անհամաձայնությունների պատճառով՝ ՆԱՏՕ-ի անդամ պետությունները որոշել են ընդարձակել ռազմական այդ դաշինքի ներկայությունն Արևելյան Եվրոպայում։ Այդ նախաձեռնության շրջանակներում նախատեսվում է չորս գումարտակ ստեղծել Էստոնիայում, Լատվիայում, Լիտվայում և Լեհաստանում։
