Ռուսաստանի Դաշնության հյուսիսային մայրաքաղաք Սանկտ Պետերբուրգում մեկնարկել է Հայաստանի Հանրապետության և Ռուսաստանի Դաշնության նախագահներ Սերժ Սարգսյանի և Վլադիմիր Պուտինի հանդիպումը։ Այս մասին տեղեկացնում է ռուսական «ՌԻԱ» լրատվական գործակալությունը։
ՌԴ նախագահ Վլադիմիր Պուտինի հետ հանդիպման ընթացքում Սերժ Սարգսյանն ասել է. «Ղարաբաղի վերաբերյալ մեր դիրքորոշումը հայտնի է բոլորին։ Մենք ցանկանում ենք, որ այդ հարցը լուծվի բացառապես խաղաղ ճանապարհով»։
Սերժ Սարգսյանը շնորհակալություն է հայտնել Վլադիմիր Պուտինին հակամարտության կարգավորման գործում ՌԴ նախագահի ներդրած ջանքերի համար։
Շարունակելով իր խոսքը՝ Սարգսյանն ասել է. «Ցավոք, մեկ կողմի ցանկությամբ այսպիսի հակամարտությունները չեն կարգավորվում։ Մենք ուրախ կլինեինք, եթե այսօր կարողանայինք առաջ շարժվել այն պայմանավորվածությունների համաձայն, որոնց հասել ենք, այսինքն՝ ստեղծել հրադադարի ռեժիմի խախտման հետաքննության մեխանիզմներ։ Դա աշխատանքային տրամադրվածություն կստեղծի բանակցությունների համար»։
Կարդացեք նաև
Աղբյուրի համաձայն՝ ՌԴ նախագահ Պուտինը համաձայնել է քննարկել այդ բոլոր հարցերը։
Տեղեկացնենք նաև, որ ՌԴ նախագահ Պուտինը երկկողմանի հանդիպում է ունենալու նաև Ադրբեջանի նախագահ Իլհամ Ալիևի հետ, որից հետո երեք պետության նախագահները կհանդիպեն արդեն եռակողմ ձևաչափով։
