Այսօր Շենգավիթ վարչական շրջանի ընդհանուր իրավասության դատարանում ՝ ծննդկան Մերի Մարգարյանի եւ նրա նորածնի մահվան դեպքով «Շենգավիթ» բժշկական կենտրոնի բժշկուհի Շուշանիկ Բախշյանի, Անի Բաբելյանի դեմ դատական գործի առաջին նիստն էր:
Բժշկուհու շահերը ներկայացնող փաստաբան Կարեն Սարդարյանը նիստին չէր եկել: Դատավոր Դավիթ Բալայանն ամբաստանյալների ներկայացուցիչներին հարցրեց՝ «ինչո՞ւ չի եկել, արհամարհե՞լ է: Ձեզ է արհամարհել, մեզ է արհամարհել, հա՞»:
Մյուս ամբաստանյալ Անի Բաբելյանի պաշտպան Հակոբյանը խնդրեց մեկամսյա ժամկետ տալ իրեն՝ գործի նյութերին ծանոթանալու, քանի որ ինքը նոր պաշտպան է: Դատավորը մերժեց. «Հակոբյան, դատավորը ձեզ էդքան ժամկետ չի տրամադրի, ամբաստանյալը չի հրաժարվել իր պաշտպանից, ինքը պաշտպան ուներ, թող բարի լիներ գար: Ինքը ծանոթ է արդեն գործի նյութերին: Ես միտում եմ տեսնում ձեր կողմից՝ միտումնավոր պաշտպանը չգա, ուրիշ պաշտպան գա, որ նման միջնորդությամբ հանդես գա: Երկրորդն էլ՝ ՀՀ Քրօրը դատարանին տրամադրում է 15 օր ժամկետ՝ գործի նյութերին ծանոթանալու, ես ձեզ 1 ամիս չեմ տրամադրի: Գործի նյութերը Սարդարյանից վերցրեք, ծանոթացեք, բայց դատավորը Սարդարյանի չներկայանալը նիստին համարում է անհարգելի»:
Կարդացեք նաև
Դատական նիստը հետաձգվեց, հաջորդ նիստը նշանակվեց հուլիսի 22-ին, ժամը 14.00-ին:
Ավելի ուշ Aravot.am-ի հետ զրույցում Շուշանիկ Բախշյանի ընկերուհին՝ ԲԳԹ, Շենգավիթ բժշկական կենտրոնի մանկաբարձ-գինեկոլոգ Ռուսուդան Վարդանյանն ասաց, որ հարցը վիճելի է եւ դատարանը կորոշի, թե ով է մեղավոր. «Ես գործում մտերիմ ունեմ, ճիշտ կլինի դիմեք անկախ փորձագետի, այս կամ այն կերպ իմ ցանկացած պատասխան կլինի կողմնապահ: Ես չեմ ուզում որեւէ կերպ դա ազդի ընթացող դատավարությանը: Որպես մասնագետ՝ որեւէ կարծիք հայտնելու նպատակ չունեմ եւ ցանկություն նույնպես: Ես այստեղ եմ՝ որպես ընտանիքի անդամ: Տարիների ընթացքում ես եւ Շուշանիկ Բախշյանը, ինչպես նաեւ Բաբելյան Անին դարձել ենք մտերիմ: Այդ իսկ պատճառով այստեղ եմ անկախ իմ մասնագիտական գործից՝ որպես մտերիմ: Իսկ իմ մասնագիտական կարծիքը իմ մասնագիտական կարծիքն է»:
Հարցին՝ գործի մանրամասներին ծանոթ եք, տեսնո՞ւմ եք սխալ, անգործություն կամ անբարեխղճություն՝ բժշկի կողմից՝ նա պատասխանեց. «Բոլոր հարցերի պատասխանը կտա դատարանը՝ իր որոշումով: Ունեմ իմ ուրույն կարծիքը, այնուամենայնիվ, չեմ պատրաստվում այդ կարծիքը որեւէ մեկի հետ կիսել: Ես չեմ տեսնում սխալ»:
Մեզ հետ զրույցում բժշկուհի Վարդանյանն ասաց. «Ես այստեղ բժշկի սխալը չեմ տեսնում, բայց ես նրանց ընկերուհին եմ»:
Հռիփսիմե ՋԵԲԵՋՅԱՆ