Հուլիսի 7-ին ՌԴ նախագահի միջազգային և մշակութային համագործակցության գծով հատուկ ներկայացուցիչ Միխայիլ Շվիդկոյն այցելեց Կոմիտասի թանգարան-ինստիտուտ։ Թանգարանի տնօրեն Նիկոլայ Կոստանդյանը ներկայացրեց թանգարանը, Կոմիտասի կյանքն ու ժառանգությունը, իսկ շրջայցից հետո Շվիդկոյը գրառում կատարեց պատվավոր հյուրերի համար նախատեսված տպավորությունների գրքում: Ապա պատասխանեց լրագրողների հարցերին:
Նա համոզված է, որ հայ-ռուսական մշակութային կապերը միշտ էլ սերտ են եղել, ու հիմա էլ վատ չեն: Խոսեց վերջերս Ռուսաստանում բացված Հայաստանի քաղաքակրթության թեմայով ցուցահանդեսի մասին, ինչը պատմում էր հայ ժողովրդի ժառանգության մասին, այնտեղ անդրադարձ կար նաեւ Հայոց ցեղասպանությանը: Պարոն Շվիդկոյի համոզմամբ, այս ամենը վկայում է, որ հայ-ռուսական մշակութային կապերը բարձր մակարդակի վրա են:
Կարդացեք նաև
Շվիդկոյը խոսեց «Ոսկե ծիրան» միջազգային կինոփառատոնի մասին, որտեղ Ռուսաստանը ներկայացված է 5 ֆիլմով: Նա շեշտեց, որ ռուս կինոռեժիսորներն ավանդաբար ներկայանում են այս փառատոնին: «Այն, որ ռուսաստանցի ճանաչված կինոռեժիսոր Աննա Մելիքյանը Մելիքյան է եւ ոչ թե Իվանովա, ոչ մի նշանակություն չունի, միեւնույն է՝ նա ներկայացնում է ռուսական կինեմատոգրաֆիան»,-ժպտալով ասաց Միխայիլ Շվիդկոյը:
ՌԴ նախագահի միջազգային և մշակութային համագործակցության գծով հատուկ ներկայացուցիչը նշեց, որ ՀՀ մշակույթի նախարար Հասմիկ Պողոսյանի հետ պայմանավորվել են հաջորդ տարի Հայաստան հրավիրել մի քանի դրամատիկ թատրոնի ներկայացումներ Ռուսաստանից, մտադիր են ռուսական պոեզիայի երեկոներ էլ անցկացնել:
«2018-ին նշվելու է Երեւանի 2800-ամյակը եւ Առաջին հանրապետության հարյուրամյակը: Դրանք երկու կարեւոր իրադարձություններ են, որոնք արտացոլում կունենան Ռուսաստանում՝ տարբեր ծրագրերի մեջ, չէ՞ որ մեր երկրում ապրում է ավելի քանի 2 մլն հայ, որոնք ոչ միայն հայեր են, այլեւ ՌԴ քաղաքացիներ»,-ասաց ռուս պաշտոնյան: Նա չի կարծում, թե հայկական մշակույթը վատ է ներկայացված Ռուսաստանում, ասում է՝ վերջերս Հայաստանի երիտասարդական նվագախումբն է հանդես եկել այնտեղ:
«Եվ եթե «Մոսֆիլմ» կինոստուդիայի տնօրենը Կարեն Շահնազարովն է, խոսել այն մասին, որ հայկական մշակույթը լավ չի ներկայացված Ռուսաստանում, ճիշտ չէ»,- հավելեց Շվիդկոյը: նաեւ կարծիք հայտնեց, որ, այնուամենայնիվ, արժի ժամանակակից հայ գրողներին ու նկարիչներին ներկայացնել իր երկրում:
Գոհար ՀԱԿՈԲՅԱՆ