Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում հուլիսի 7-ին շարունակվում էր Գեւորգ Սաֆարյանի գործի քննությունը:
Գեւորգ Սաֆարյանի մուտքը դատարան ուղեկցվեց ծափահարություններով եւ «Գեւորգ» վանկարկումներով: Դատական նիստի ընթացքում գործին ներգրավվեց դատախազ Պետրոս Մարտիրոսյանը, նաեւ հարցաքննվեց վկա ոստիկան Լեւոն Մզրոխյանը:
Վկան ասաց, որ Գեղամ Խաչատրյանի աջ կողմում է, տեսել է, թե ինչպես է Գեւորգ Սաֆարյանը հարվածում Գեղամ Խաչատրյանին, վերջինս ընկել է: Ըստ նրա, միջադեպը տեւել է հինգը րոպե: Վկան հայտարարեց, որ միջադեպի ներկաներից ճանաչում էր միայն Գեւորգ Սաֆարյանին: Նա հայտնեց, որ բոլորը սեռական բնույթի հայհոյանքներ էին անում, հայհոյանքներին ո՛չ ինքը, ո՛չ իր գործընկերները չեն պատասխանել, նա ասաց նաեւ, որ ոստիկանները ոչ մեկին չեն հարվածել, իսկ երբ ամեն ինչ հանդարտվել է, վկան Գեղամ Խաչատրյանի մոտ վնասվածք է նկատել:
Պատասխանելով պաշտպան Տիգրան Հայրապետյանի հարցին՝ վկան պատասխանեց, որ չի հիշում, թե միջադեպի ժամանակ Գեւորգ Սաֆարյանը եղե՞լ է, թե՞ ոչ, երբ տոնածառով տղամարդու նկատմամբ կիրառվել է ոտնակի հնարքը:
Կարդացեք նաև
Տիգրան Հայրապետյանը հայտարարեց, որ վկայի ցուցմունքում հակասություններ կան, Լեւոն Մզրոխյանն էլ պատասխանեց, որ չի կարող ասել, թե երբ է Գեւորգ Սաֆարյանը եկել: Վկան փաստաբանի խնդրանքով մանրամասնեց միջադեպը, նա ասաց, որ Գեւորգ Սաֆարյանը հայհոյելով մոտեցավ եւ հարվածեց Գեղամ Խաչատրյանին, վերջինս «վայր իջավ», իսկ թե հետո ինչ եղավ, վկան չէր հիշում:
Տիգրան Հայրապետյանը նկատեց, որ վկան պարզ հիշում էր միայն հարվածի հատվածը, նա հետաքրքրվեց, թե այդ դեպքում ինքն ապշած էր մնացել, որ համազգեստով ոստիկանին նման վերաբերմունք էին դրսեւորում: Այս հայտարարությունը լսելով դահլիճը փռթկաց:
Դատարանը սանկցիա կիրառեց դահլիճում ներկա երկու տղամարդու նկատմամբ եւ ընդմիջում հայտարարեց, որպեսզի կարգադրիչները կարողանան նրանց դատարանի դահլիճից դուրս հանել: Դահլիճում ներկաները բորբոքվեցին եւ սկսեցին բողոքել, նրանց Գեւորգ Սաֆարյանը հորդորեց հանգիստ մնալ:
Ամի ՉԻՉԱԿՅԱՆ