Փոքր երկրների Եվրոպայի չեմպիոն բասկետբոլի Հայաստանի ազգային հավաքականի գլխավոր մարզիչ Տիգրան Գյոկչյանը, հավաքականի երեք երիտասարդ խաղացողներ եւ ՀԲՖ փոխնախագահ Արա Պողոսյանը այսօր հանդիպեցին լրատվամիջոցների ներկայացուցիչներին:
Արա Պողոսյանն ասաց, որ ներկայիս հավաքականը կազմավորելու համար երկար տարիների աշխատանք է կատարվել նախ պատանի ու երիտասարդ բասկետբոլիստների շրջանում: Նրա խոսքերով այսօր ազգային հավաքականի հիմնական անդամներից ոմանք հանդես են եկել երիտասարդական թիմում:
Եվրոպայի այս առաջնությունում տարած հաղթանակը ենթադրում է արդեն այս տարվանից Հայաստանում պրոֆեսիոնալ ակումբ ստեղծել, որը կխաղա Ռուսաստանի Սուպեր լիգայում, Եվրոպայի գավաթներից որեւէ մեկում:
Խոսելով հանրապետությունում բասկետբոլը զարգացնելու ծրագրերի մասին՝ Արա Պողոսյանը նշեց, որ, ցավոք, այսօր Հայաստանում շատ թե քիչ որակյալ բասկետբոլիստներ չկան, որոնք կարող են մոտ ժամանակներում համալրել ակումբն ու ազգային հավաքականը: «Երկար տարիների աշխատանք է անհրաժեշտ, առնվազն՝ 10 տարի: Նախ, պետք է մասսայականություն ապահովել՝ մոտ 10 հազար պարապող, որոնցից ոմանք հնարավոր է համալրեն հավաքականը», – ասաց նա:
Ֆեդերացիայի փոխնախագահը նաեւ խոստացավ, որ իրենք աշխատելու են այսուհետեւ էլ ուրախացնել հայ մարզասերներին: Բայց նաեւ ավելացրեց. «Հաղթանակներ տոնելու ցանկությունը շատ մեծ է, ինչի համար անելու ենք ամեն բան: Բայց սա սպորտ է ու պարտություններից էլ հնարավոր չէ խուսափել: Խնդրում ենք, եթե պարտություն ունենանք, մեզ միանգամից չգնդակահարեք»:
Աշոտ ՀԱԿՈԲՅԱՆ
