«Ֆրանսիան միշտ իր պատրաստակամությունն է հայտնել՝ ընդունելու Հայաստանի եւ Ադրբեջանի նախագահներին՝ միտված թնջուկի վերաբերյալ լուծումներ գտնելուն»,- հուլիսի 12-ին Մամուլի ազգային ակումբում լրագրողների հետ հանդիպման ընթացքում ասաց Հայաստանում Ֆրանսիայի դեսպան Ժան-Ֆրանսուա Շարպանտիեն:
Նա նշեց, որ Ֆրանսիան ԵԱՀԿ Մինսկի խմբի համանախագահության կազմում այդ ուղղությամբ աշխատում է իր ռուս եւ ամերիկացի գործընկերների հետ. «Մինսկի խմբի համանախագահող երեք երկրներում ամենաբարձր մակարդակով շատ աչալուրջ հետեւում ենք այդ խնդրին: Բոլորովին վերջերս տեղի ունեցած Վարշավայի գագաթաժողովի շրջանակներից դուրս տեղի ունեցավ նաեւ հանդիպում՝ Ֆրանսիայի Հանրապետության նախագահի հանդիպումը իր երկու գործընկերների հետ՝ Հայաստանի եւ Ադրբեջանի նախագահների: Բնականաբար, օրակարգային խնդիր էին Լեռնային Ղարաբաղի հիմնախնդրի կարգավորմանն ուղղված հարցերը: Մենք կարծում ենք՝ սա հնարավորություն է ավելի օպտիմալացնելու հնարավորությունները՝ միտված հարցի կարգավորմանը»:
Անդրադառնալով Սանկտ Պետերբուրգում տեղի ունեցած Սարգսյան-Պուտին -Ալիեւ հանդիպումից հետո մամուլում տարածված խոսակցություններին, թե անհամաձայնություն կա ԵԱՀԿ Մինսկի խմբի համանախագահների միջեւ անվտանգության մեխանիզմների նկատմամբ, Ժան-Ֆրանսուա Շարպանտիեն ասաց, որ ո՛չ թյուրիմացություն կա, ո՛չ անհամաձայնություն. «Անվտանգության մեխանիզմների տեղադրումը շատ կարեւոր միջոցառում է բուն բանակցային գործընթացի հեռանկարում»:
Ամի ՉԻՉԱԿՅԱՆ
