ՄՕԿ-ի հայտարարությունը Պեկինի օլիմպիական խաղերի բրոնզե մեդալակիր, ծանրորդ Տիգրան Մարտիրոսյանի որակազրկման մասին, կայծակնային արագությամբ տարածվեց նաեւ հայկական լրատվական դաշտում:
Aravot.am-ը ծանրամարտի Հայաստանի ֆեդերացիայի գլխավոր քարտուղար եւ տղամարդկանց ազգային հավաքականի գլխավոր մարզիչ Փաշիկ Ալավերդյանի հետ զրուցեց այդ թեմայի շուրջ:
-Պարոն Ալավերդյան, ՄՕԿ-ը փաստորեն հաստատել է մեր լավագույն մարզիկներից մեկի՝ ծանրորդ Տիգրան Մարտիրոսյանի որակազրկման փաստը եւ առաջարկել վերադարձնել Պեկինի օլիմպիական խաղերի մեդալը: Ձեր մեկնաբանությունը տեղի ունեցածի մասին:
-Հայաստանի ծանրամարտի ֆեդերացիան այդպիսի պաշտոնական նամակ չի ստացել: Այն պետք է որ ՀԱՕԿ ուղարկված լինի: Բայց քանի որ այդ տեղեկությունը հրապարակվել է ՄՕԿ-ի կայքում, դա կարելի գնահատել որպես իրողություն:
Կարդացեք նաև
Ինչ վերաբերում է մեդալը վերադարձնելուն, այդ հարցը վերջնական պատասխան կստանա ամենամոտ ժամանակներս՝ ծանրամարտի միջազգային ֆեդերացիայի հրավիրվելիք գործկոմի ընդլայնված նիստից հետո միայն:
-Հնարավո՞ր է, որ միջազգային ֆեդերացիան չեղյալ համարի ՄՕԿ-ի որոշումը:
-Եկեք մի փոքր էլ սպասենք: Բայց իմ անձնական կարծիքով դա քիչ հավանական է: Համենայն դեպս, ես այդպիսի նախադեպ այս պահին չեմ հիշում: Ամենայն հավանականությամբ, Տիգրանը կվերադարձնի Պեկինի օլիմպիական մեդալը:
– Տիգրանի որակազրկումը գրեթե անխուսափելի է: Բայց երբ մարզիկ է որակազրկվում, ապա նշվում է՝ որքան ժամանակով, երբվանից է այն ուժի մեջ մտնում եւ երբ է ավարտվում: Դրան ավելացրած, հստակ որոշվում է նաեւ, թե կարգազանցության փաստի արձանագրումից հետո նրա մյուս նվաճումներին ի՞նչ ճակատագիր է սպասվում:
-Վերջին շրջանում համաշխարհային դոպինգ սկանդալները նոր երեւույթ են համաշխարհային սպորտում: Նման բան երբեք չի եղել: Կարծում եմ, այս պահին ձեր հարցերի պատասխանը ոչ-ոք չգիտի: Կկայանա IWF- ի գործկոմի ընդլայնված նիստը, հետո հակադոպինգային կոդեքսը խախտած բոլոր մարզիկների (ոչ միայն ծանրամարտում) նկատմամբ կիրառվելիք պատժամիջոցների հաստատման կամ մերժման, պատժամիջոցների կիրառման ժամկետների, ձեւերի, խստության հետ կապված բոլոր հարցերը կդրվեն ՄՕԿ-ի քննարկման սեղանին եւ միայն դրանից հետո ամեն բան հայտնի կդառնա ու ձեր տված բոլոր հարցերի պատասխանները կտրվեն:
Աշոտ ՀԱԿՈԲՅԱՆ
