Մարմնամարզիկ Դավիթ Ֆահրադյանը միակ հայ մարմնամարզիկն է, որը չորս անգամ Գինեսի գրքի ռեկորդ է սահմանել: Վերջինի՝ պտտաձողի վրա 1144 պտույտի հաստատմանը նա սպասել է երկու տարի եւ հավաստագիրը վերջերս է ստացել: Այսօր այդ առիթով հրավիրված շնորհանդեսի ժամանակ Դավիթ Ֆահրադյանն ասաց, որ արդեն 13 տարի է, ինչ ինքը նախաձեռնում է ռեկորդներ սահմանել, որոնք սակայն հեշտ չեն տրվում:
«Յուրաքանչյուրի համար ամիսների ու տարիների ծանրաբեռնված մարզումներ են պահանջվում: Եթե ես հիմա ուզենամ կրկնել պտտաձողի վրա 36 րոպե 12 վայրկյանում կատարած 1144 պտույտները, պետք է կրկին մի քանի ամիս նախապատրաստվեմ», – ասաց ռեկորդակիրը եւ ավելացրեց, որ պլանավորել է մոտ ժամանակներս նոր ռեկորդ սահմանել: Դա լինելու է Լոս Անջելեսում, որտեղ արդեն ընտրվել է դահլիճը, պայմանավորվածություն ձեռք բերվել համապատասխան հեռուստաընկերության հետ:
Aravot.am-ի հետ զրույցում Դավիթ Ֆահրադյանը ճշգրտեց, որ մի քանի օրից մեկնելու է Լոս Անջելես՝ տեղում նախապատրաստվելու, իսկ հինգերորդ ռեկորդը կգրոհի մոտավորապես մեկ ամիս հետո: Մեր երկրորդ հարցին, թե դեռ որքա՞ն ժամանակ է մտադիր շարունակել ռեկորդների գրոհը, Դավիթ Ֆահրադյանը պատասխանեց. «Դժվարանում եմ ասել: Բայց քանի դեռ զգում եմ, որ կարող եմ, շարունակելու եմ: Իսկ երբ ժամանակը վրա հասնի, հեռանալու եմ հաղթած»
Կարդացեք նաև
Աշոտ ՀԱԿՈԲՅԱՆ
