ՀՀ երջանկահիշատակ վարչապետ Անդրանիկ Մարգարյանի պապերի գյուղում՝ Շիրակի մարզի Լուսաղբյուրում, որի միջնակարգ դպրոցը կրում է հենց Անդրանիկ Մարգարյանի անունը, այսօր բացվեց նախնական զինվորական պատրաստվածության դասասենյակ ՝ ի հիշատակ Ջեբրայիլում նահատակված հերոսի՝ 20-ամյա Խաչատուր Հարությունյանի։
Նրան Արցախում ճանաչել են Կասկա մականունով։ Մեկ տարի չորս ամիս Արցախում ծառայած Խաչատուրը զոհվել էր մայիսի 17-ին ժամը 00․50-ին դիպուկահարի կրակոցից։
Լուսաղբյուրցիները և անչափ հպարտ էին, որ հերոս են տվել հայրենիքին, և չէին կարող թաքցնել վիշտը․ անդադար արտասվում էին։ Գյուղում հպարտորեն նշում են՝ այն դիրքերը, որը հսկել է Խաչատուրը, թշնամին չի կարողացել սողոսկել․ անգամ մեկ մետր առաջ գալ։ Խաչատուրը կես թիզ հող անգամ չի զիջել թշնամուն՝ իր կյանքը դնելով զոհասեղանին։
Կարդացեք նաև
Նշենք, որ այս գյուղի բնակիչները աչքի են ընկնում իրենց բացառիկ հայրենասիրությամբ․ նրանց նախնիները Արևմտյան Հայաստանի Մուշ ու Բասեն գավառներից տեղահանված մարդիկ են։ Գյուղը հիմնադրվել է 1826-1829 թթ․-ին, իսկ Հայոց Մեծ եղեռնի ժամանակ Մուշի Ղարս գյուղի բնակիչներից շատերը ապաստան են գտել Լուսաղբյուրում։ Նրանց թվում են եղել նաև Անդրանիկ Մարգարյանի պապերը։
Նունե ԱՐԵՎՇԱՏՅԱՆ
