Տրանսպորտի, կապի եւ տեղեկատվական տեխնոլոգիաների նախարարություն շենքը կառավարության հոկտեմբերի 6-ի նիստին որոշվեց վաճառել:
Ըստ «Հայկական ժամանակ» օրաթերթի, շենքը պատրաստվում է գնել «Ռոստելեկոմ» ընկերությունը, եւ վաճառքի մասին որոշում է եղել «Ռոստելեկոմից» ստացված առաջարկի հիման վրա:
Aravot.am-ի հարցին՝ «Ռոստելեկոմ»-ը պատրաստվո՞ւմ է մասնակցել նշված շենքի վաճառքի աճուրդին, ընկերությունից վստահեցրին, որ ներկայումս ընկերությունում նման որոշում եւ քննարկում չկա:
Պետական գույքի կառավարման վարչությունից մեզ վստահեցրին, որ առայժմ շենքի համար որեւէ գնորդ չկա, բացի այս, դեռ աճուրդ պետք է հայտարարվի, որից 15 օր առաջ այդ մասին կհայտարարվի: Ուստի, գնորդների մասին տեղեկություն կլինի միայն աճուրդին հայտ ներկայացնելուց հետո:
Կարդացեք նաև
Նշենք, որ այս շենքի մի մասն արդեն սեփականաշնորհված է, իսկ նախարարության հատվածը 7809 քառակուսի մետր է, որն, ըստ կառավարության որոշման, գնահատվել է 13.2 միլիարդ դրամ, շենքի հետ նաեւ վաճառվում է կից 0.25 հեկտար հողամասը:
«Գույքի գնահատված արժեքի կազմում է 13 միլիարդ 223 միլիոն 413 հազար դրամ, գնորդը պարտավոր է վճարել նաեւ հողամասի բաժնային մասի կադաստրային արժեքը` 151 միլիոն 226 հազար դրամ»,- գրված է կառավարության որոշման մեջ:
Շենքի վաճառքի անհրաժեշտության մասին էլ պետական գույքի կառավարման վարչությունը հիմնավորել է հետեւյալ կերպ. «ՀՀ տրանսպորտի եւ կապի նախարարությանն ամրացված 7809.9 քառ. մետր մակերեսով տարածքից մի շարք տարածքներ (ընդհանուր մակերեսը կազմում է 1887.4 քառ. մետր) վարձակալությամբ հանձնված են այլ կազմակերպությունների, որոնցից երկուսի վարձակալության ժամկետը լրանում է 2017, իսկ մեկինը` 2018 թվականներին:
Ելնելով պետական գույքի կառավարման արդյունավետության բարձրացման քաղաքականությունից՝ ներկայացված նախագծով առաջարկվում է նշված գույքը ներկայացնել օտարման՝ աճուրդով»:
Կառավարության որոշման մեջ պատմամշակութային այս շենքի պահպանման վերաբերյալ էլ գրված է՝ «Գույքի հանձնում-ընդունումից հետո՝ ՀՀ օրենսդրությամբ սահմանված կարգով պատմության եւ մշակույթի հուշարձանների պահպանության բնագավառի լիազորված մարմնին տալ հուշարձանի պահպանական պարտավորագիր, ինչպես նաեւ գույքի օգտագործման նպատակի և բնույթի փոփոխումները համաձայնեցնել պատմության եւ մշակույթի հուշարձանների պահպանության բնագավառում լիազորված մարմնի հետ, իսկ ներդրումների իրականացմամբ հուշարձանի փոփոխումը՝ միայն լիազորված մարմնի եզրակացության հիման վրա՝ ՀՀ կառավարության թույլտվությամբ»:
Այսինքն, պատմական այս հուշարձանը որեւէ փոփոխության ենթարկելու համար, նոր սեփականատերը պետք է համաձայնեցնի համապատասխան պետական մարմինների հետ:
Հիշեցնենք, որ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը մինչ նախարարի պաշտոնին նշանակվելը եղել է «GNC-ալֆա»-ի, այսինքն՝ «Ռոստելեկոմ»-ի տնօրենների խորհրդի նախագահը:
Նելլի ԲԱԲԱՅԱՆ
