Ճարտարապետ Հրաչիկ Պողոսյանն Aravot.am-ի հետ զրույցում առաջին տպարանի շենքի քանդման վերաբերյալ ասաց՝ կենտրոնական հատվածն է քանդվել, որի մասին վաղուց որոշում կար. «Քաղաքաշինական խորհուրդը նայել էր մի նախագիծ, որը չընդունվեց, բայց այդ կենտրոնական մասի քանդելուն ոչ ոք դեմ չէին: Մյուս 2 կորպուսները մնալու են»:
Պարոն Պողոսյանն ասաց, որ տեղում նախատեսվող շինության նախագիծը քննարկման կարիք ունի, կարելի է այն վերանայել:
Նշենք, որ կառուցապատողի ներկայացմամբ՝ նախատեսվում է տեղում հյուրանոց կառուցել:
Հիշեցնենք, որ համար 1 տպարանի շենքի ճարտարապետներից է Ալեքսանդր Թամանյանը, շենքը կառուցվել է 1920-ական թվականներին:
Կարդացեք նաև
Չնայած այս շենքն ընդգրկած չէ պատմության եւ մշակութային անշարժ հուշարձանների պետական ցանկում, սակայն սոցիալական ցանցերում բուռն արձագանք եղավ շենքի քանդման կապակցությամբ: Երեւանցիների դիտարկմամբ՝ Թամանյանի նախագծած 100 տարվա շենքը որպես պատմություն պետք է պահպանվի:
Ճարտարապետ Հրաչիկ Պողոսյանի կարծիքով էլ՝ «Թամանյանը արել է նաեւ տարբեր տեսակի ոչ կարեւոր շենքեր: Նա շատ բեղմնավոր ճարտարապետ է եղել, բայց Թամանյանը կապ չուներ այդ շենքի կենտրոնական մասի հետ, դա ուղղակի հետո սարքած բան էր: Պարզապես հիմա ինչ մնացել է, դա պետք է վերականգնվի, իհարկե կարելի է վերանայել նախագիծը, որպեսզի համահունչ լինի մյուս շենքերին, բարեբախտաբար ամբողջ շենքը չեն քանդել»:
Նելլի ԲԱԲԱՅԱՆ
