«2016 թվականին նախագահի աշխատակազմին եւ ազգային անվտանգության խորհրդին հատկացված 5 միլիարդ 97 միլիոն դրամի դիմաց այս տարի ներկայացված գումարը նվազել է 504 միլիոն դրամով: Այդ նվազումը պայմանավորված է նրանով, որ նախագահի կարգադրությամբ լուծարվել է ազգային անվտանգության խորհրդի աշխատակազմը եւ այն դարձել է նախագահի աշխատակազմի ստորաբաժանում»,- խորհրդարանում ընթացող 2017 թվականի բյուջեի նախագծի քննարկումների ժամանակ հայտարարեց նախագահի աշխատակազմի ղեկավար Արմեն Գեւորգյանը:
Հիշեցնենք, Հայաստանի 2017 թվականի բյուջեի նախագծով ՀՀ նախագահի աշխատակազմին նախատեսվում է հատկացնել 4,5 միլիարդ դրամ։
Արմեն Գեւորգյանի ներկայացմամբ՝ գալիք տարվա բյուջեում 520 հազար դրամով նվազել է նաեւ կառավարման ակադեմիայի համար նախատեսված գումարը: Օպտիմալացվելու են ակադեմիայի կոմունալ ծախսերը:
Կարդացեք նաև
2017թվականին Նախագահի աշխատակազմը նախատեսում է իրականացնել բազմաթիվ օրենքների նախագծերի եւ միջազգային պայմանագրերի փորձաքննություններ: Մեծածավալ աշխատանք է նախատեսվում նախագահի այցերի, պաշտոնական պատվիրակությունների ընդունելության հետ կապված։ Նախատեսվում է իրականացնել արտաքին քաղաքականության հարցերում նախագահի գործունեության ապահովման աշխատանքներ՝ արտասահմանյան այցերի եւ պետությունների ղեկավարների Հայաստան այցերի: Նախատեսվում է 970 հանդիպումներ` «բովանդակային մասի ապահովում»: Նախագահի աշխատակազմը եկող տարի միջազգային կազմակերպությունների կողմից Հայաստանի վերաբերյալ 20 զեկույցների ուսումնասիրություն էլ կիրականացնի:
Նելլի ԳՐԻԳՈՐՅԱՆ
