Այսօր երեկոյան տեղի ունեցավ ՀՀԿ Շիրակի տարածքային կազմակերպության խորհրդի նիստը, կառույցի ղեկավար վերընտրվեց Սահակ Մինասյանը։ Կուսակցության տարածքային կազմակերպության խորհրդի 24 անդամներից 6-ը բացակայել են, 18 մասնակիցները միաձայն վերընտրել են Սահակ Մինասյանին։
Aravot.am-ի այն հարցին, թե մամուլում շոշափվում էին նաև այլ թեկնածուների անուններ, մի՞թե միայն իր թեկնածությունն է առաջադրվել, չկայի՞ն այլ հավակնորդներ կուսակցական այդ պաշտոնում, Սահակ Մինասյանն ասաց․«Որ կարող է լինել այլակարծություն կուսակցությունում, ընդդիմախոսություն, սա ես նույնպես չբացառելով՝ ողջունում եմ։ Սա ևս մեկ փաստարկ է, որ մեր կուսակցությունն աշխատում է ավելի բաց, ավելի թափանցիկ, թափանցիկ այն աստիճանի, որ ընդդիմախոսությունը ոչ թե մնում է կուսակցության պատերի ներսում, այլ հասնում է հրապարակային դաշտ, սա նույնպես ողջունելի է։ Եվ ես որպես մակխորհրդի նախագահ՝ ասում եմ, որ ցանկացած առողջ ընդդիմախոսություն, առողջ այլախոհություն ես գնահատել եմ և նաև մոտեցել եմ ըմբռնումով․ առանց այլախոհության, առանց տարակարծություն առաջընթացները դինամիկ չեն լինի երբեք»։
ՀՀԿ Շիրակի տարածքային կազմակերպության խորհրդի նախագահի պաշտոնում շոշափվում էր նաև ԱԺ պատգամավոր Սուքիաս Ավետիսյանի անունը, սակայն նրան այսօր չտեսանք ՀՀԿ կառույցում, ավելին` նա չպատասխանեց մեր հեռախոսազանգերին, որպեսզի լսեինք նաև նրան, թե ինչ այլակարծություն կա ՀՀԿ-ում։
Կարդացեք նաև
Նունե ԱՐԵՎՇԱՏՅԱՆ