Շիրակի պետական համալսարանի պատմության և փիլիսոփայության ամբիոնի վարիչի պաշտոնակատար Հովհաննես Խորիկյանը հրաժարվել է ամբիոնի վարիչի ժ/պ-ի պարտականություններից։
Նա իր ֆեյսբուքյան էջում ներկայացրել է ռեկտորի ժ/պ Երվանդ Սերոբյանին ուղարկված դիմումը, որը սուր քննադատություն է հենց ռեկտորի ժ/պ-ի հասցեին։
Հովհաննես Խորիկյանը իր դիմումի մեջ գրել է․ «Չհանդուրժելով բուհի կառավարման ձեր կործանարար քաղաքականությունը՝ սույն թվականի ապրիլի 14-ից հրաժարվում եմ ամբիոնի վարիչի պաշտոնակատարի պաշտոնից ՝ պահպանելով պատմական գիտությունների դոկտոր, դոցենտի մեկ դրույքաչափ ծանրաբեռնվածությունս և գիտական խորհրդի ընտրված անդամի կարգավիճակս»։
Կարդացեք նաև
Հովհաննես Խորիկյանը ֆեյսբուքյան գրառմամբ էլ հեգնել է․ «4 տարի պաշտոնակատար միայն աննորմալ հիմնարկում ու երկրում կարող են լինել…»։
Հովհաննես Խորիկյանը մեր զրույցում ասաց․ «Երվանդ Սերոբյանն անգործության մատնված մարդ է, մտածում է միայն անձնական բարգավաճման մասին։ Թող այս հեղափոխական իշխանությունները ստուգեն, թե այս երեք տարվա մեջ իրենց սիրելի ռեկտորի ժ/պ-ն ինչ նյութական ձեռքբերումներ ունի։
Ասեմ նաև՝ միայն այս բուհում է, որ դոկտոր ես դառնում ու աշխատավարձդ չի բարձրանում, նման խայտառակություն գոյություն չունի։ Ուրիշ բուհերում միանվագ հավելավճար են տալիս ու աշխատավարձը բարձրացնում եմ։ Այս բուհում Սահակ Մինասյանը չեղյալ է համարել»։
Հովհաննես Խորիկյանը 2016-2017 թվականններին զբաղեցրել է պատմության, իրավագիտության և նրանց դասավանդման մեթոդիկաների ամբիոնի վարիչի պաշտոնը, 2017 թվականի մայիսից էլ մինչև այսօր ամբիոնի վարիչի պաշտոնակատար է։
Ըստ Հովհաննես Խորիկյանի, Երվանդ Սերոբյանը ռեկտորի երեք տարվա պաշտոնակատար է, որը օրենքի խախտում է։ Նրա ձևակերպմամբ՝ ռեկտորի ժ/պ նշանակվել է ապօրինի ձևով՝ բուհի կանոնադրությունը խախտելով։
Հովհաննես Խորիկյանը նաև նշեց, որ Երվանդ Սերոբյանը շատ բուռն մասնակցություն է ունեցել նախկին ՀՀԿ-ական ռեկտոր Սահակ Մինասյանի պաշտոնավարման ժամանակ իրեն աշխատանքից ապօրինի ազատելու հարցում։ Այդ ժամանակ վերջինս էթիկայի հանձնաժողովի անդամ է եղել, և ՀՀԿ-ական ռեկտորի կողմից նշանակված է եղել պրոռեկտոր։
Մեր զրուցակցի ասելով, Երվանդ Սերոբյանը ռեկտորի ժ/պ դառնալուց հետո անօրինական նկատողություն է տվել իրեն, որը, սակայն, բողոքարկվել է դատական կարգով, առաջին ատյանի դատարանն անօրինական է համարել։ Բուհի ղեկավարությունը դիմել է Վերաքննիչ դատարան, որն էլ, ըստ Հովհաննես Խորիկյանի, անհասկանալի պատճառներով, հետ է ուղարկել առաջին ատյանի դատարան՝ նոր քննության։
Այս թեմայի շուրջ կլսենք նաև ՇՊՀ-ի ռեկտորի ժ/պ Երվանդ Սերոբյանին:
Նունե ԱՐԵՎՇԱՏՅԱՆ
