ԱՄՆ-ի նախագահի պաշտոնում Դոնալդ Թրամփի ընտրությունը մեծ զարմանք առաջ բերեց ոչ միայն Ամերիկայում, այլ նաեւ աշխարհի տարբեր երկրներում։ Վերլուծաբաններն ու փորձագետներն այս օրերին փորձում են վերլուծել իրադրությունը, պարզելու, թե ինչ կարող է սպասել ԱՄՆ-ին ու տարբեր երկրների հետ նրա հարաբերություններին Թրամփի օրոք, երբ վերջինս 2017 թվականի հունվարի 20-ին երդման արարողությունից հետո հայտարարվի ԱՄՆ-ի նախագահ։
ԱՄՆ-ի դեմոկրատ կոնգրեսական Ջիմ Քոսթան, որն ի դեպ ընտրությունների արդյունքում վերընտրվել է, «Ամերիկայի Ձայն»-ի հայկական ծառայությանն ընտրության արդյունքների հրապարակումից ժամեր անց հեռախոսով ասաց, թե անցած 18 ամիսներն ընդգծել են Ամերիկայում առկա պառակտումը։
Արդյո՞ք Թրամփի նախագահության օրոք հնարավոր է Հայոց ցեղասպանության ճանաչում նախագահի մակարդակով։
Այս հարցին կոնգրեսական Ջիմ Քոսթան պատասխանում է, որ Կոնգրեսում հայկական հարցերով հանձնախումբն այդ հարցը պետք է բարձրացնի վաղ թե ուշ։
Կարդացեք նաև
«Շատ կարեւոր է, թե արտաքին քաղաքականության ինչ թիմ կընտրի Թրամփը։ Չեմ կարծում, որ Հայոց ցեղասպանության մասին Թրամփն ունի համապատասխան տեղեկատվություն։ Պետք է տեսնել, թե ում է նա նշանակելու պետքարտուղարի պաշտոնում։ Խոսակցություններ կան, դեռեւս չհաստատված լուրեր, որ արտաքին գերատեսչության ղեկավարի պաշտոնը նա կարող է առաջարկել Ներկայացուցիչների պալատի նախկին նախագահ Նյութ Գինգրիչին»։
Կոնգրեսականը խոստանում է Կոնգրեսում իր գործընկերների հետ միասին շարունակել Հայոց ցեղասպանությունը ճանաչելու, ԱՄՆ-Հայաստան հարաբերությունները խորացնելու եւ Հայաստանի համար կարեւոր այլ հարցերի շուրջ ու խնդիրները լուծելու ուղղությամբ կիրառվող ջանքերը։
Մանրամասներին կարող եք ծանոթանալ՝ «Ամերիկայի ձայն»-ի կայքում:
