«Հայաստանի ինովացիոն զարգացումն այլընտրանք չունի: Եթե մենք ուզում ենք հաղթել և ունենալ զարգացած, առաջադեմ երկիր՝ մեր ճանապարհը ինովացիաներն են, մեր ճանապարհը տեխնոլոգիական զարգացումն է: Այդ է պատճառը, որ ինովացիոն ֆորումը մենք համարում ենք մեր կարևորագույն միջոցառումը»,-նոյեմբերի 15-ին լրագրողների հետ հանդիպման ժամանակ նման կարծիք հայտնեց Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը:
4-րդ ամենամյա Բիզնես ինովացիոն ֆորումը կանցկացվի նոյեմբերի 18 –ին և 19-ին Դիլիջանում «Հայաստան 20.18- 2018թ.` Հայաստանը 20 ամենանորարար երկրների շարքում» խորագրի ներքո:
Պարոն Չոբանյանը ներկայացրեց ֆորումի մանրամասները, օրակարգային հարցերը. «Ֆորումը կրում է ամենամյա բնույթ: Ֆորումին մասնակցելու են տեղական և միջազգային հեղինակավոր ընկերությունների ներկայացուցիչներ ու փորձագետներ, նախորդ տարիների համեմատ, այս տարի ամենաշատ գործընկերներն են մասնակցելու ինովացիոն ֆորումին: Ֆորումի ընթացքում մասնագետների թեմատիկ քննարկումների, գործարար ներկայացումների և շփումների միջոցով կներկայացվի ինովացիոն զարգացման առաջավոր փորձը: Նաև կմշակվի օրակարգ՝ 2018 թ. Հայաստանն աշխարհի 20 ամենանորարար երկրների շարքում դիրքավորելու համար: Ինովացիոն ֆորումի հիմնական թեմաներն են`նորարարական ապրանքներ և ծառայություններ, բիզնես պրոցեսների զարգացում ինովացիաների միջոցով, գիտելիքներ նորարարարության և զարգացման համար, ռազմավարություն` դեպի ինովացիոն տնտեսություն:»
ՀՀ տնտեսական զարգացման և ներդրումների փոխնախարար Էմիլ Տարասյանն էլ նշեց , որ ինովացիոն քաղաքականության իրականացումը ամենաանհրաժեշտ նախապայմաններից է տնտեսության աճի ապահովման համար: Նրա խոսքով՝ այս ֆորումը բացառիկ հարթակ է փորձի փոխանակման և ՏՏ ոլորտը ճիշտ ուղղությամբ զարգացնելու համար:
Կարդացեք նաև
«Մենք մեծ ուշադրություն ենք դարձնում ֆորումի շրջանակներում պետական քաղաքականության քննարկման հարցերին, ինչը բավական լուրջ արդյունավետություն է տալիս: Մենք այս անգամ հյուրեր ունենք Բուլղարիայից, Ռուսաստանից, Գերմանիայից, Իսրայելից, որոնք կներկայացնեն իրենց փորձը և այն բավական ուսանելի կլինի» – ասաց փոխնախարարը:
Բիզնես ինովացիոն ֆորումն ավանդաբար իրականացվում ԻՏՁՄ-ի կողմից` ՀՀ վարչապետի բարձր հովանու ներքո: Ֆորումի հովանավորն է «Աջակցություն ՓՄՁ զարգացմանը Հայաստանում» ծրագիրը, որն իրականացվում է Եվրոպական միության և Գերմանիայի տնտեսական համագործակցության ու զարգացման դաշնային նախարարության ֆինանսավորմամբ և «Մասնավոր հատվածի զարգացում Հարավային Կովկասում » ծրագրի կողմից:
Ռուզաննա ԴԻԼԱՆՅԱՆ
