Այսօր ԱԺ ճեպազրույցների ժամանակ Aravot.am-ը ՀԱԿ խմբակցության քարտուղար Արամ Մանուկյանից հետաքրքրվեց՝ ՊՆ նախարար Վիգեն Սարգսյանը խնդրեց, որ ովքեր դեմ են զինվորների համար 1000 պարտադիր վճարի նախագծին, գոնե չմասնակցեն քվեարկությանը, Դուք ինչո՞ւ չանսացիք նրա խնդրանքին եւ դեմ քվեարկեցիք:
Արամ Մանուկյանը պատասխանեց. «Վիգեն Սարգսյանն ինձ համար ավտարիտետ չի, ուրեմն ես չգիտե՞մ ոնց եմ քվեարկելու: Մենք ամեն ելույթի վրա աշխատում ենք 10 օր, մեզ օգնում են լուրջ մասնագետներ, լուրջ թիմ: ՀԱԿ-ը քննադատում է` հիմնավորելով, թե ինչպես կարելի է լուծել այդ խնդիրը»:
Նա հիշեցրեց, որ Բաբկեն Արարքցյանը ժիգուլիով էր գալիս, հիմա նայեք քանիսն են շքեղ մեքենաներով գալիս կառավարությունից ու ասում են՝ փող չկա: Ուռճացված ապարատ է, իրենք չե՞ն զգում քո ասածը, լուրջ վերլուծությունը, թե չէ մտածում են՝ Արամին դրեցի տեղը, ասեցի՝ էն ժամանակ աշխատավարձը այսքան էր:
Մեր հարցին՝ զինվորը ձեր դեմ քվեարկելուց վատ ազդակ չի՞ ստանա, որովհետեւ այդպես էր պատճառաբանվում Վիգեն Սարգսյանի խնդրանքը՝ նա պատասխանեց, որ ոչ. «Եթե ես զինվորին բացատրում եմ, որ տասնապատիկ ավելին կարող է լինել, ցույց եմ տալիս ճանապարհը, որ 1000 դրամով չպետք է որոշվի զինվորի ապահովվածությունը՝ ոչ»:
Կարդացեք նաև
Ըստ նրա, «պետությունը չունի հնարավորություն» արտահայտություն անող կառավարությունը անմիջապես պետք է հրաժարական տա. «Ես առաջարկում եմ տասնապատիկ ավելի եւ արժանապատիվ լուծում»:
Արամ Մանուկյանն ասաց, որ այնուամենայնիվ, թե օրենքն ընդունվի, ինքը օրենքը հարգող մարդ է, կվճարի:
Հռիփսիմե ՋԵԲԵՋՅԱՆ
