ՀՀ գյուղատնտեսության նախարար Իգնատի Առաքելյանն այսօր ԳՆ «Գյուղատնտեսական ծրագրերի իրականացման գրասենյակ» պետական հիմնարկի ղեկավար կազմին ներկայացրել է տնօրենի պաշտոնակատար Գեղամ Գևորգյանին:
ՀՀ գյուղատնտեսության նախարարը կարևորել է ԳԾԻԳ-ի կողմից իրականացվող աշխատանքները, ինչպես նաև բարձր է գնահատել նախկին տնօրեն Գագիկ Խաչատրյանի կատարած մեծածավալ աշխատանքը:
Նախարարը նշել է, որ Գեղամ Գևորգյանը քաջատեղյակ է Համաշխարհային բանկի կողմից իրականացվող աշխատանքներին և առաջիկայում անհրաժեշտ է քննարկել այն ուղիները, որոնք առավել արդյունավետ կլինեն գյուղատնտեսության ոլորտի համար:
«Նախ պետք է գույքագրել «Համայնքների գյուղատնտեսական ռեսուրսների կառավարման և մրցունակության» (CARMAC) առաջին և երկրորդ ծրագրերի շրջանակներում կատարված աշխատանքներն ու գրանցված արդյունքները, վերլուծել արդյունավետությունը և ընտրել առավել կարևոր ուղղությունները, քանի որ ունենք սահմանափակ ֆինանսական միջոցներ»,- նշել է Իգնատի Առաքելյանը:
Կարդացեք նաև
Նախարարը հանձնարարել է ակտիվ համագործակցել նախարարության համապատասխան վարչությունների հետ, քննարկել հատկապես անասնապահության և անասնաբուժության ոլորտներում իրականացվող ծրագրերը, դրանց արդյունավետությունը և շարունակականության նպատակահարմարությունը, ինչպես նաև քայլեր կատարել «կաթի մթերումից մինչև արտադրություն» շղթայի զարգացման ուղղությամբ:
ՀՀ գյուղատնտեսության նախարարը ներկաների ուշադրությունն է հրավիրել նաև տոհմային գործի զարգացման, արտադրության շղթայի, կաթի որակի, գնի կարևորության վրա:
Հանդիպման ավարտին ՀՀ գյուղատնտեսության նախարարը հաջողություններ է մաղթել Գեղամ Գևորգյանին նոր պաշտոնում և հույս հայտնել, որ աշխատակազմի հետ համատեղ նրան կհաջողվի կարճ ժամանակում լուծել առաջադրված խնդիրները:
ՀՀ գյուղատնտեսության նախարարության տեղեկատվության և հասարակայնության հետ կապերի բաժին
