Եվրոպայի գործող չեմպիոն Հռիփսիմե Խուրշուդյանը երեկ մեկնարկած ծանրամարտի Հայաստանի կանանց առաջնությունում կատարում էր գլխավոր մրցավարի պարտականությունները:
Նրան այդ դերում տեսնելն անսովոր էր: Aravot.am-ը անվանի մարզուհուն խնդրեց պատասխանել, թե սա, արդյոք նշանակում է, որ արդեն մտածում է մարզական ակտիվ կարիերան ավարտելու մասին:
«Ո՜չ, ի՜նչ եք ասում: Ես որակազրկված չեմ, այլ առայժմ ժամանակավորապես հեռացվածի կարգավիճակում եմ: Ամեն օր մտնում եմ մարզադահլիճ եւ մարզվում եմ: Կանանց ծանրամարտում նոր քաշային կարգ է սահմանվել՝ 90 կիլոգրամ: Այդ նորամուծությունը, կարծես, հատուկ ինձ համար է եւ չեմ կարող դա ձեռքիցս բաց թողնել: Իսկ մրցավարություն առաջին անգամ չէ, որ անում եմ, երբ ինքս չեմ մասնակցում», – ասաց Հռիփսիմե Խուրշուդյանը:
Աշոտ ՀԱԿՈԲՅԱՆ