Արտաքին գործերի նախարարներ Էդվարդ Նալբանդյանը և Սամեհ Հասան Շուքրին ուղերձներ փոխանակեցին՝ Հայաստանի Հանրապետության և Եգիպտոսի Արաբական Հանրապետության միջև դիվանագիտական հարաբերությունների հաստատման 25-ամյակի կապակցությամբ:
Էդվարդ Նալբանդյանն իր ուղերձում արձանագրում է, որ անցած քառորդ դարը եղել է միջպետական հարաբերությունների վերընթաց զարգացման և երկու ժողովուրդների միջև բարեկամության շարունակական խորացման ժամանակաշրջան։
Նախարար Նալբանդյանը շեշտում է, որ եգիպտահայերը պատմականորեն կարևոր դերակատարում են ունեցել Եգիպտոսի նորագույն պատմության մեջ և այսօր էլ էական ներդրում ունեն երկու երկրների հարաբերությունների զարգացման գործում:
Էդվարդ Նալբանդյանը նշում է, որ հպարտ է, որպես Եգիպտոսում Հայաստանի առաջին արտակարգ և լիազոր դեսպան, անմիջականորեն մասնակցելու մեր միջպետական հարաբերությունների սկզբնավորմանն ու ամրապնդմանը։
Կարդացեք նաև
Հայաստանի արտգործնախարարը համոզմունք է հայտնում, որ միասնաբար զարգացնելու ու խորացնելու ենք մեր համագործակցությունը՝ հանուն մեր երկու բարեկամ ժողովուրդների բարօրության։
Սամեհ Շուքրին իր ուղերձում նշում է, որ երկու պետությունների ժողովուրդների միջև ջերմ հարաբերությունները գալիս են պատմության խորքից:
Նախարար Շուքրին շեշտում է, որ Հայաստանի և Եգիպտոսի միջև բարեկամական հարաբերությունները և համագործակցությունը հիմնված են փոխադարձ հարգանքի և ընդհանուր շահերի վրա: Եգիպտոսի արտգործնախարարը հավելում է, որ սա հանգեցրել է բազմաթիվ, այդ թվում՝ տարածաշրջանային և միջազգային հարցերի շուրջ երկխոսության՝ ի հավելումն երկկողմ հարաբերությունների տարբեր ոլորտների:
Սամեհ Շուքրին վստահություն է հայտնում, որ երկու երկրների միջև բարեկամությունը և համագործակցությունը հետագա տարիների ընթացքում կշարունակեն զարգանալ և խորանալ:
ՀՀ ԱԳՆ
