Շուրջ մեկ ժամից Ստրասբուրգում կմեկնարկի Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանը: Այն կանցկացվի ապրիլի 24-28-ը:
Մինչ վեհաժողովի մեկնարկը՝ ադրբեջանցի քաղաքացիական հասարակության ներկայացուցիչները բողոքի ակցիայով են դիմավորում ԵԽԽՎ պատվիրակներին: «Ազատ արձակեք քաղբանտարկյալներին», «Ուշադրություն Ադրբեջանին», «ԵՄ, դադարեցրու աջակցել Ալիևի ռեժիմին», «Ամոթ է, վերջ տվեք կաշառվածությանը». այսպիսի կոչերով պաստառներով ցուցարարները եվրոպացիների ուշադրությունն են հրավիրում Ադրբեջանում տիրող իրավիճակին:
Հիմնականում բոլոր պատվիրակները մինչև ԵԽԽՎ-ի նստավայր մուտք գործելը կանգնում, ընթերցում են այս պաստառները, որոշներն իրենց դժգոհությունը հայտնում:
Կարդացեք նաև
Նշենք, որ ընդհանրապես նստաշրջանի մեկնարկից առաջ ԵԽԽՎ բոլոր նախագահները ասուլիս էին անցկացնում, սակայն պարզեցինք, որ ներկայիս նախագահը` Պեդրո Ագրամունտը, այդ ավանդույթին վերջ է տվել: Նա այլևս ասուլիսներ չի տալիս, ուստի նրան առանձին հարց հղելու համար անհրաժեշտ է նախօրոք հերթագրվել:
Նստաշրջանի օրակարգում է Թուրքիայի խնդիրը՝ ոչ թե հատուկ կամ հրատապ քննարկման ձևաչափում, այլ որպես կանոնավոր քննարկում: Այն վերաբերելու է Թուրքիայում ժողովրդավարական ինստիտուտների գործունեության խնդիրներին: Հատուկ քննարկում նվիրվելու է Թուրքիայում անցկացված հանրաքվեի արդյունքներին:
Կներկայացվի նաև Եվրոպայի խորհրդի մարդու իրավունքների հարցերով հանձնակատար Նիլս Մուժնիեքսի տարեկան զեկույցը՝ 2016-ի գործունեության մասին:
Վեհաժողովը կհյուրընկալի Իսպանիայի թագավորին:
Տաթև ՀԱՐՈՒԹՅՈՒՆՅԱՆ
