Aravot.am-ը ՀՀ ԿԳՆ լեզվի պետական տեսչության նախկին պետ Լավրենտի Միրզոյանից հետաքրքրվեց` ինչպես է վերաբերվում կառույցի լուծարմանը:
«Կա կիրարկման կարգ, որը Լեզվի մասին օրենքի ընդունումից հետո է ընդունվել, Լեզվի մասին օրենքի կիրարկման կարգում գրված է՝ կառավարության կազմում ստեղծել գործադիր իշխանության հանրապետական մարմին, այնուհետեւ կառավարության կազմում ստեղծվել է Լեզվի պետական տեսչությունը, որը մինչեւ 2002 թ. գործել է որպես կառավարությանն առընթեր մարմին, ապա 2002-ին մտցվել է ԿԳ նախարարության աշխատակազմ՝ որպես առանձնացված ստորաբաժանում: Այդ օրվանից մինչ հիմա Լեզվի պետական տեսչությունը տնվորի կարգավիճակում է, ծվարած էր ԿԳ նախարարության ծոցում: Այսօր միակ տեսչությունն է Հայաստանի Հանրապետությունում, որը ազգային անվտանգության խնդիր է իրականացնում` Լեզվի մասին օրենքի պահանջներին համապատասխան»:
Լեզվի պետական տեսչության նախկին պետը կարծում է, որ տեսչությանը պետք է ավելի մեծ կարգավիճակ տրվեր, բայց նրա խոսքերով, առայժմ որեւէ մեկը որեւէ հստակ մեկնաբանություն չի տալիս, թե ի՞նչ է լինելու այդ կառույցի լուծարվելուց հետո:
«Կառավարության որոշման մեջ գրված է, որ մինչեւ տարեվերջ տեսչությունը պետք է լուծարվի, բայց թե ո՞վ պետք է Հայաստանի Հանրապետությունում լեզվական քաղաքականությունն իրականացնի, Լեզվի մասին օրենքի դրույթներն ո՞վ պետք է իրականացնի, պարզ չէ: Եթե Լեզվի տեսչությունը վերացնում ես, ուրեմն Լեզվի մասին օրենքը եղած-չեղած մի հաշիվ է»
Գոհար ՀԱԿՈԲՅԱՆ
