Իջեւանի քաղաքապետ Վարդան Ղալումյանից տեղեկացանք, որ Իջեւանում փողոցային առեւտուր կատարողների մի խումբ մայիսի 15-ին հանդիպելով քաղաքապետին, ցանկություն է հայտնել վերսկսելու փողոցային առեւտուրը: Քաղաքապետը Իջեւանի քաղաքապետարանի շենքի առաջ հանդիպելով այդ առեւտրականներին՝ ասել է, որ փողոցային առեւտուրը հակաօրինական, հակասանիտարական գործունեություն է, որը նաեւ խախտում է հավասար մրցակցությանը, դրա համար օրենքով նախատեսվում է տուգանք: Իջեւանում փողոցային առեւտուր անողները սպառնացել են փակել Իջեւանով անցնող միջպետական ավտոճանապարհը:
Քաղաքապետն ասաց, որ դրանից հետո իրեն զանգահարել է Իջեւանի քաղաքային շուկայի տնօրեն Գառնիկ Օհանյանը, որն ասել է, թե շուկայում օրինական կարգով առեւտուր կատարող մոտ 300 հոգի, լսելով փողոցում վաճառք կատարողների եւ քաղաքապետի հանդիպման լուրը, կարծելով, որ քաղաքապետը Իջեւանում կարող է թույլատրել անօրինական, փողոցային առեւտուրը, որը խախտում է մրցակցության պայմանները, նույնպես սպառնացել են փակել միջպետական ավտոճանապարհը:
Վ. Ղալումյանն ասաց, որ ինքը շուկայի տնօրենին վստահեցրել է, որ իրենք գործել եւ գործելու են օրենքի սահմաններում, Իջեւանում փողոցային, ապօրինի առեւտուր չի իրականացվելու:
Ոսկան ՍԱՐԳՍՅԱՆ
