Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում Նորք Մարաշում ԱԱԾ-ի կողմից հայտնաբերված զինված խմբի անդամների դատավարությունն է:
Պաշտպաններից 9-ը չէին ներկայացել նիստին, ամբաստանյալ Արմեն Հայրապետյանի փաստաբան Հերմինե Միքայելյանն էլ տեղեկացրել էր դատարանին, որ ինքը վատառողջ է եւ հնարավոր է երկար ժամանակ չկարողանա մասնակցել դատական նիստերին, ուստի դատավոր Բեկթաշյանը առաջարկեց Հայրապետյանին, որ նիստին ներկա փաստաբաններից որեւէ մեկին ընտրի՝ որպես իր շահերի պաշտպան այս նիստում, մինչեւ հետո նոր պաշտպան կգտնի: Դատավորն ասաց՝ հակառակ դեպքում ստիպված են դատական նիստը հետաձգել: Նա 30 րոպե ընդմիջում հայտարարեց, մինչեւ Հայրապետյանը կողմնորոշվի:
Ընդմիջման ժամանակ փաստաբաններից 6-ը եկան: Զինված խմբի ղեկավար Արթուր Վարդանյանի պաշտպաններից մեկը նույնպես չէր եկել: Դատավորը նրան տեղեկացրեց, որ իր պաշտպանը խնդրել է դատարանին նիստը հետաձգել: Արթուր Վարդանյանը չհամաձայնեց, նա հորդորեց նիստը շարունակել առանց փաստաբանի:
Ավելի ուշ, երբ նիստը սկսվեց, դատավորը եւս 2 ժամով հետաձգեց նիստը՝ ասելով, որ հանրային պաշտպան պետք է ներգրավվի:
Հռիփսիմե ՋԵԲԵՋՅԱՆ
