Բնապահպան Կարինե Դանիելյանի համոզմամբ, եթե տնտեսապես ջրի սակագնի բարձրացումը արդարացված է, ապա սոցիալական ու բնապահպանական առումով՝ ոչ:
«Երկար ժամանակ մենք մի խումբ բնապահպաններով պայքարում էինք, որ ջրի մինիմալ քանակը, որն անհրաժեշտ է մարդուն խմելու և սանիտարահիգիենիկ պայմաններն ապահովելու համար, լինի անվճար, իսկ դրանից հետո գումար գանձել արդեն պրոգրեսիվ ճանապարհով: Մեր մոտեցումն այդպիսին էր, բայց մեր կարծիքը հաշվի չառնվեց, միայն խոստացան, որ սոցիալապես անապահով խավերը անվճար կստանան կամ զեղչ կունենան, բայց այդպես էլ դա չեղավ»,- այսօր «Հենարան» ակումբում ասաց Կարինե Դանիելյանը՝ անդրադառնալով խմելու ջրի սակագինը բարձրացնելու հարցով Հանրային ծառայությունները կարգավորող հանձնաժողովին դիմելու «Վեոլիա Ջուր» ընկերության մտադրությանը:
Տիկին Դանիելյանը նկատեց, որ շատ երկրներում ջրի համար գործում են զեղչեր, եւ ինչպես արտասահմանում, այնպես էլ Հայաստանում ջուրը չի դիտվում որպես մարդու իրավունքի դրսևորում, այլ՝ որպես ապրանք, որը վաճառում են. «Հասկանում եմ, «Վեոլիա Ջուր»-ը մեծ խնդիրների առաջ է կանգնած, կորուստները ահռելի են, տարբեր գնահատականներով 60-80 տոկոս: Համակարգը պետք է կապիտալ նորոգվի: Բայց կա մի երևույթ. կան մարդիկ, որոնք օրենքից վեր են, ջուրն օգտագործում են՝ ինչպես ուզում են, չեն վճարում դրա դիմաց ու դա համարվում է արդեն կորուստ: Այս խնդիրն էլ պետք է վերանայվի, պետք է օրենք լինի, որը կպաշտպանի բոլորի իրավունքները: Համաձայնվել ջուրը թանկացնելու առաջարկին՝ այդքան էլ ճիշտ չէ»:
Արփինե ՍԻՄՈՆՅԱՆ
