Այսօր «Հայացք» ակումբում փաստաբան Տիգրան Հայրապետյանը հայտարարեց, որ Կարո Եղնուկյանը «Սասնա ծռերի» գործով չի ուզում մասնակցել դատական նիստերին: Նա դիմում է գրել ՀՀ գլխավոր դատախազին, ոստիկանապետին, ՀՔԾ-ին, արդարադատության նախարարին, որ անիմաստ տեղն իրեն վատ պայմաններով տեղափոխում են կալանավայրից եւ 8 ժամ դատարանի նկուղում պահում, ինչն անմարդկային վերաբերմունք է եւ արժանապատվությունը ոտնահարող հանգամանք:
Տիգրան Հայրապետյանն ասաց, որ դատական սանկցիա կա Եղնուկյանի նկատմամբ եւ նրան չպետք է ուղեկցեն դատարան, բայց Եղնուկյանին տեղափոխում են, անտեղի պահում նկուղում եւ հետ բերում:
Ի պատասխան Եղնուկյանի դիմումի՝ Քրեակատարողական վարչության պետի ժամանակավոր պաշտոնակատար Ռ. Հովհաննիսյանը պատասխանել է, որ դատական սանկցիայի առկայության պայմաներում Կարո Եղնուկյանը պարտավոր չէ ներկայանալ նիստին: Սակայն, միեւնույն է, դատավոր Ա. Գաբրիելյանը ցուցում է տալիս քրեակատարողական հիմնարկին, որ Եղնուկյանին տեղափոխեն դատարան:
Ըստ Եղնուկյանի՝ «Սա սադրանք է իշխանությունների կողմից, դատավորի կողմից արհեստականորեն ստեղծվում է այնպիսի վիճակ, որ ՔԿՀ եւ ոստիկանության ծառայողները ստիպված են ուժ կիրառել իմ նկատմամբ եւ հակառակ իմ կամքի ինձ տեղափոխեն դատարան: Սա շարունակությյունն է այն բանի, որ նույն դատավորը դատարանում ջուր ունենալու համար իմ նկատմամբ կիրառեց դատական սանկցիա»:
Եղնուկյանը հայտնել է. «Ես վճռականորեն եմ տրամադրված եւ պաշտոնապես հայտարարում եմ, որ չեմ ենթարկվելու նման դատարանի ապօրինի կարգադրությանը, եթե դա կարելի է դատարան համարել, ես չեմ տեղափոխվելու դատարան: Եթե իմ նկատմամբ ուժ գործադրվի, ապա դրա բոլոր անդառնալի հետեւանքները եւ ողջ պատասխանատվությունը ընկնում է պաշտոնատար անձանց վրա, ում դիմում է ուղարկվել»:
Ըստ Եղնուկյանի, ինքը որեւէ հակաիրավական արարք չի կատարել, ուստի իր դեմ նման արհամարհական եւ անմարդկային վերաբերմունքը խոշտանգում է քաղաքացու նկատմամբ:
Եղնուկյանը դիմումում պահանջում է պատասխանատվության ենթարկել նման ակնհայտ ապօրինի որոշումներ կայացնող դատավոր Արտուշ Գաբրիելյանին:
Հռիփսիմե ՋԵԲԵՋՅԱՆ
