«Դա ապօրինի որոշում է». դատավորն ի հակառակ «Սասնա ծռերի» կամքի՝ հանրային պաշտպան ներգրավեց

Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող  «Սասնա ծռեր» զինված խմբի անդամներից 18-ի գործով  նիստը վերսկսվելուն պես դատավոր Արտուշ Գաբրիելյանը որոշեց մերժել իր դեմ ավելի վաղ ամբաստանյալ Սերգեյ Կյուրեղյանի կողմից ներկայացված ինքնաբացարկի միջնորդությունը: Այսինքն, նիստը շարունակելու է նախագահել Արտուշ Գաբրիելյանը:

Այնուհետեւ նա Սերգեյ Կյուրեղյանին հիշեցրեց՝ իր համար հանրային պաշտպան են հրավիրել՝ Լիանա Գասպարյանին. համաձա՞յն է, որպեսզի վերջինս լինի իր պաշտպանը: Կյուրեղյանը պնդեց, որ իր պաշտպանը Մուշեղ Շուշանյանն է, որը խուզարկվելու պատճառով չի ներկայանում, եւ ինքը Շուշանյանից չի հրաժարվում:

Լիանա Գասպարյանի առնչությամբ Կյուրեղյանը դիրքորոշում չհայտնեց, ու ոստիկաններն ուղեկցեցին նրան, քանի որ դատարանի հանդեպ անհարգալից վերաբերմունքի համար որոշակի ժամանակով հեռացված է նիստերի դահլիճից: «Հաշվի առնելով, որ նա դիրքորոշում չհայտնեց, եւ ենթարկված է սանկցիայի, իսկ այդ դեպքում պաշտպանի ներկայությունը պարտադիր է, դատարանը որոշում է Լիանա Գասպարյանին ներգրավել որպես Սերգեյ Կյուրեղյանի պաշտպան»,-հայտարարեց Արտուշ Գաբրիելյանը:

Լիանա Գասպարյանն առարկեց. «Ներգրավում տեղի չի ունեցել, անձը ոչ միայն համաձայնություն չի տվել, այլեւ հեռացել է դահլիճից: Դա ձեր միանձնյա որոշումն է, որն անօրինական է»: Ապա Լիանա Գասպարյանը համապատասխան օրենսդրական մեջբերումներով բացատրեց, որ անձը համաձայնություն չի տվել իր պաշտպանությանը, իսկ այդ դեպքում նա չի կարող ներգրավվել որպես հանրային պաշտպան:

Դատավորը, սակայն, առարկությունը չընդունեց եւ Լիանա Գասպարյանին ներգրավեց նաեւ որպես ամբաստանյալ Թորոս Թորոսյանի շահերի պաշտպան:

Ապա Լիանա Գասպարյանը միջնորդություն արեց՝ կասեցնել գործի վարույթը, որպեսզի փաստաբանները կարողանան դիմել սահմանադրական դատարան առ այն, որ առանց ամբաստանյալների կամքի՝ դատավորը պաշտպան է ներգրավում: Դատավոր Արտուշ Գաբրիելյանը, սակայն, գտավ, որ միջնորդությունը ժամանակին չի ներկայացված: Սա առաջացրեց ամբաստանյալների եւ նրանց պաշտպանների դժգոհությունը: Փաստաբանները կրկին բղավելով դատավորի վրա՝ դժգոհեցին նրա, իրենց բնորոշմամբ, ապօրինի գործողությունների դեմ: «Դուք նպատակ ունեք փակուղի մտցնել այս գործը»,-բղավեց փաստաբան Ինեսա Պետրոսյանը:

Արտուշ Գաբրիելյանն իր որոշումն անփոփոխ թողեց, ապա նիստը հետաձգեց, քանի որ ամբաստանյալ Մարտիրոս Հակոբյանը, հայտնի որպես «Դեդ», պաշտպան չուներ. Մուշեղ Շուշանյանն այսօր առողջական խնդիրների պատճառով չի ներկայացել:

Առաջիկա նիստը կկայանա հաջորդ հինգշաբթի:

Լուիզա ՍՈՒՔԻԱՍՅԱՆ