ԱԺ-ում քննարկվեց Միջազգային գիտատեխնիկական կենտրոնի գործունեությունը շարունակելու մասին համաձայնագիրը վավերացնելու հարցի քննարկումը:
ԿԳ նախարարության գիտության պետական կոմիտեի նախագահ Սամվել Հարությունյանն ասաց, որ 94-ից Հայաստանը միացել է համաձայնագրին, մեծ օգուտներ ենք ժամանակին ստացել դրանից: Կենտրոնը երաշխավորում է գիտական ծրագրեր, որոնք հետագայում կարող են ֆինանսավորվել դրամաշնորհային ծրագրերով:
«Ծառուկյան» դաշինքի պատգամավոր Սերգեյ Բագրատյանը հարցրեց՝ ֆինանսավորման կարգը, որը հաստատվել է կոմիտեում, կարող է կասկածների տեղիք տալ, կոռուպցիոն ռիսկեր չե՞ք տեսնում, որ մի գիտնականի կամ մի գիտական խմբի առավելություն տրվի եւ ոչ օբյեկտիվ մոտեցում լինի, խտրականություն:
Հարությունյանը բացառեց նման բան, ասելով, որ հանձնաժողովն է ընտրում ծրագրերը. «Այն ծրագրերը, որոնք իրենց մեջ պարունակում են լուրջ գիտական ձեւակերպումներ, հստակ խնդիր է ձեւակերպված եւ որոշակի պայմանների է համապատասխանում, ընդունվում են: Ծրագրում պետք է ներգրաված լինեն երիտասարդներ, ասպիրանտների պաշտպանության խնդիրն էլ է դրվում: Կոռուպցիոն ռիսկեր ես բացառում եմ»:
Սամվել Հարությունյանն ասաց, որ միգուցե առանձին ծրագրերի դեպքում հնարավոր է կոռուպցիա լինի, բայց հանձնաժողովին մեղադրել, որ կոռուպցիայի կգնա՝ սխալ է: «Փորձագիտական լուրջ հանձնաժողով կա: Ծրագրերի բախտն էլ իրենք են որոշում»:
«Ելք» խմբակցության ղեկավար Նիկոլ Փաշինյանը հարցրեց. «Համաձայնագրում կարմիր թելի նման անցնում է զանգվածային ոչնչացման զենքերի հետ կապված խնդիրը: Այս համաձայնագրով ՀՀ հնարավորությունները սահմանափակվո՞ւմ են, թե՞ չեն սահմանափակվում: Մասնավորապես, ենթադրենք ՀՀ-ն իր անվտանգության նկատառումներով կարող է մշակումներ անել տեխնոլոգիաների ձեռք բերման առումով, այս համաձայնագիրը կսահմանափակի մեզ, օրինակ, Իրանի հետ ատոմային էներգիայի ոլորտում համագործակցությանը»:
Հարությունյանը վստահեցրեց, որ համաձայնագրում նման որեւէ կետ չկա, որ կսահմանափակվի:
ԱԺ փոխխոսնակ Միքայել Մելքումյանը հարցրեց՝ «Վերջերս մամուլում անընդհատ խոսում են ստորագրահավաքի մասին՝ կապված տարիքային ցենզի հետ: Տարիքով մարդկանց սահմանափակում են գիտական թեմատիկ աշխատանքներին մասնակցելը: Խնդրում եմ պարզաբանեք, որ այդ թեման փակվի»:
Սամվել Հարությունյանը պատասխանեց. «Մենք 70-ն անց մարդկանց չենք արգելում զբաղվել գիտությամբ, արգելում ենք զբաղվել գիտության մենեջմենթով»: Նա ասաց, որ շուտով առանձին հոդվածով մանրակրկիտ կբացատրի, թե ինչ ողբալի վիճակում ենք մենք գտնվում: Մեր գիտական ծրագրերի 30 տոկոսը երիտասարդներ են ղեկավարում: 35-ից հետո արտասահմանից հրավեր են ստանում՝ մարդիկ թողնում, հեռանում են ու այդ տարիքային խմբում վակուում ունենք:
«Ծառուկյան» դաշինքից Նաիրա Զոհրաբյանը սատարեց Հարությունյանի տեսակետը, որ շտամպ կա, նույն մարդիկ դարեր շարունակ ղեկավարում են ու պետք է քայլեր ձեռնարկեն, որ մեր գիտական ներուժը չարտագաղթի: Գիտական վերնախավ կա, բոլոր տեղերը իրենք են զբաղեցնում, իսկ երիտասարդ գիտնականներին մնում է «Զվարթնոց» օդանավակայանում հերթ կանգնել՝ հեռանալու համար:
Հարությունյանը վստահեցրեց, որ ընդհանուր առմամբ մեր գիտական արդյունքը առաջ է անցել տնտեսական հնարավորություններից:
Հռիփսիմե ՋԵԲԵՋՅԱՆ
