Ինչպես ավելի վաղ հայտնել էինք, 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» զինված խմբի անդամներից 18-ի գործով դատական նիստում այսօր դատավոր Արտուշ Գաբրիելյանը որոշեց 11 ամբաստանյալների մասն անջատել քրեական գործից եւ հանձնել մեկ այլ դատավորի: Այսինքն, «Սասնա ծռերի» քրեական գործն, ընդհանուր առմամբ, քննվելու է 3 մասով (14, 7 եւ 11 ամբաստանյալներ):
Դատարանում լրագրողների հետ զրույցում «Սասնա ծռեր»-ի պաշտպաններից Երվանդ Վարոսյանն ասաց. «Արտուշ Գաբրիելյանն ընտրեց ոչ թե ինքնաբացարկի տարբերակը, այլ գործից մաս անջատելու տարբերակը: Տպավորություն է, որ իրենց համար կարեւոր նշանակություն ունեցող ամբաստանյալների մասն են հանձնում մեկ այլ դատավորի»:
Փաստաբանի խոսքով՝ գործերի տարանջատումը չի բխում արդարադատության շահից. «Առաջին տարանջատումն արեցին տեխնիկական նպատակով, իսկ հիմա՝ դատավոր փոխելու նպատակով: Կարծում եմ՝ որոշվել է, որ Արտուշ Գաբրիելյանը չի քննելու գործը: Ամեն դեպքում, գործի քննության որակը սրանից տուժելու է: Սա ոչ թե իրավունքից եկող որոշում էր, այլ նպատակահարմարությունից»:
Երվանդ Վարոսյանը կարծում է, որ գործի քննությունն այսպես նաեւ ձգձգվելու է. նույն ապացույցները հետազոտվելու են տարբեր դատարաններում:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
