Երեւանի Շենգավիթ վարչական շրջանի ընդհանուր իրավասության դատարանում կաշառք պահանջելու եւ ստանալու մեջ մեղադրվող դատավոր Իշխան Բարսեղյանի գործով դատական նիստն այսօր կրկին հետաձգվեց: Այս անգամ էլ հետաձգման պատճառը նույնն էր՝ նախկին դատավորի ինքնազգացողության վատանալը:
Դատական հաջորդ նիստը տեղի կունենա հոկտեմբերի 9-ին:
Բարսեղյանի պաշտպան՝ փաստաբան Վարդուհի Էլբակյանը Aravot.am-ին ասաց, որ իր պաշտպանյալին ՔԿՀ-ից դատարան են բերել ստիպողաբար՝ արյան բարձր ճնշմամբ, հողաթափերով եւ սպորտային հագուստով. «Այսօր ճնշումը եղել է, ըստ Իշխան Բարսեղյանի, 220-130 եւ նրան շատ ուժեղ դեղ են սրսկել, որպեսզի ընդամենը 10 րոպեում իջեցնեն ճնշումը եւ տեղափոխեն դատարան: Ճնշումը մինչեւ 130 է իջել, նրան ասել են, որ այսօր անպայման պետք է դատարան տեղափոխվի»:
Հիշեցնենք, որ Իշխան Բարսեղյանին մեղադրանք է առաջադրվել այն բանի համար, որ նա 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Արփինե ՍԻՄՈՆՅԱՆ
