Էրեբունի եւ Նուբարաշեն վարչական շրջանների ընդհանուր իրավասության դատարանում այսօր 2016թ. հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված ու մի շարք ծանր հանցագործությունների մեջ մեղադրվող «Սասնա ծռեր» զինված խմբին օժանդակելու մեջ մեղադրվող քաղաքական գործիչ Անդրիաս Ղուկասյանի գործով հերթական դատական նիստն է:
Ամբաստանյալ Անդրիաս Ղուկասյանը մինչեւ վկաների հարցաքննությունը միջնորդություն ներկայացրեց, այս անգամ՝ իր հանդեպ խափանման միջոց կալանքը գրավով փոխարինելու վերաբերյալ: Ղուկասյանը վստահեցրեց, որ գրավի կիրառմամբ իրեն ազատ արձակելու դեպքում չի խոչընդոտի գործի քննությանը եւ չի խուսափի վարույթն իրականացնող մարմնից. «Ես ՀՀ քաղաքացի եմ, ունեմ մշտական բնակության վայր, ամուսնացած եմ, ունեմ անչափահաս երեխա: Քաղաքական գործիչ եմ՝ «Նոր Հայաստան» հանրային փրկության ճակատի հիմնադիրներից, եղել եմ նախագահի թեկնածու»:
Գործով մեղադրող-դատախազ Պետրոս Պետրոսյանը միջնորդության դեմ առարկեց՝ գտնելով, որ այն անհիմն է. «Մեղադրյալին կալանքի տակ պահելու հիմքերն առկա են: Մեծ է հավանականությունը, որ նրա կողմից ոչ պատշաճ վարքագիծ կդրսեւորվի»:
Ղուկասյանի շահերի պաշտպան, փաստաբան Կարեն Մեժլումյանն իր հերթին նշեց, որ դատախազը չունի հիմնավոր փաստարկներ այն մասին, որ Ղուկասյանը գրավով ազատ արձակվելու դեպքում կխոչընդոտի գործի քննությանը եւ կներազդի վկաների վրա:
Դատարանը հեռացավ խորհրդակցական սենյակ՝ որոշում կայացնելու:
Լուիզա ՍՈՒՔԻԱՍՅԱՆ
