Այսօր ԶՈՒ գլխավոր շտաբի պետ, գեներալ-գնդապետ Մովսես Հակոբյանը լրագրողների հետ զրույցում անդրադարձավ հունվարի 7-ին զոհված զինծառայող Վաչե Չիլինգարյանի հետ կապված դեպքի հանգամանքներին:
Հիշեցնենք, որ ՊԲ ժամկետային զինծառայող Չիլինգարյանը՝ 1998թ. ծնված, հունվարի 7-ին՝ ժամը 13:20-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու վիրավորում էր ստացել:
Դեպքի հետ կապված հարուցվել է քրեական գործ: Մովսես Հակոբյանն ասաց, որ նա զոհվել է հակառակորդի կողմից՝ դիպուկահարի կրակոցից. «Այս պահին կարող եմ արձանագրել այն, որ որեւէ մեկ խախտում այդ զինվորը չի իրականացրել: Ինչպես է դա ստացվել, դեռեւս պետք է պարզենք: Միանշանակ փաստ է, որ զինվորը խոցվել է հակառակորդի դիպուկահարի կողմից, հրամանատարը, որը գնացել է զինծառայողին օգնություն ցուցաբերելու, եւս վիրավորվել է: Օպերատիվ խումբը, որը մեկնել է դեպքի վայր, եւս կրակի տակ է ընկել, երկու վիրավոր կա: Վիրավորները թեթեւ վնասվածքներ ունեն: Ուզում եմ առանձնացնել սպայի սխրագործությունը, որը մեկ վայրկյան չի մտածել՝ նետվել է՝ իր զինվորի կյանքը փրկելու համար»:
Մովսես Հակոբյանն ասաց, որ հակառակորդն անընդհատ նոր ձեւեր, մեթոդներ է փնտրում՝ մեր զինվորներին խոցելու համար: Իսկ ընդհանուր առմամբ Նոր տարվա ընթացքում սահմանի վրա խաղաղ է եղել:
Ինչ վերաբերում է շմոլ գազից զինվորի թունավորման դեպքին՝ Մովսես Հակոբյանը պարզաբանեց. «Լողանալու ժամանակ զինվորը թունավորվել էր ու մահացել»:
Հռիփսիմե ՋԵԲԵՋՅԱՆ
Վերնագիրը չի համապատասխանում նյութի բովանդակությանը: Սպանվել է ոչ թե սպան, այլ զինվորը, իսկ սպան վիրավորվել է, երբ շտապել է օգնություն ցուցաբերել զիվորին: